თბილისის მერმა, კახა კალაძემ გლდანის გამგებლად დანიშნა პირი, რომელმაც 4 წლის წინ თანამშრომელს სილა გააწნა. კალაძის განცხადებით, კონფლიქტი ლევან ნაროუშვილსა და მის ხელქვეითს შორის წლების წინ, წინა მერის დროს მოხდა, თუმცა მერის თქმით, თემა ამოწურულია.

"თუ კითხვები არსებობდა ამასთან დაკავშირებით უნდა დასმულიყო მაშინ, როდესაც ამ წლების განმავლობაში ის [ნაროუშვილი] თანამდებობის პირი იყო", — აღნიშნა დედაქალაქის მერმა.

თავად ნაროუშვილი ამბობს, რომ ინციდენტი მასსა და მის თანამშრომელს შორის აბსოლუტურად პირადული იყო და რომ სამსახურთან არანაირი კავშირი არ ჰქონია.

"ჩვენ ვართ მეგობრები, ვიყავით მანამდეც. აღნიშნულ ფაქტს ჩვენთვის მუშაობაში ხელი არ შეუშლია, ავჭალისა და გლდანის საკეთილდღეოდ. ეს იყო პირადი ინციდენტი, რომელსაც არავითარი შეხება არ აქვს სამსახურთან. ეს იყო ორ მეგობარს შორის პატარა გაუგებრობა. სამწუხაროდ, მოხდა ეს ფაქტი 4 წლის წინ", — განაცხადა ნაროუშვილმა ჟურნალისტებთან საუბრისას.

კახა კალაძემ გლდანის გამგებლად ლევან ნაროუშვილის დანიშვნის შესახებ თბილისის მერიის სხდომაზე განაცხადა. ნაროუშვილი ამ დრომდე, გამგებლის მოადგილის თანამდებობას იკავებდა.