კომპანია გლოვოს განცხადებით, პროტესტში მონაწილე კურიერებისგან ისინი კონკრეტულ მოთხოვნებს ელოდებიან, რათა საუბარი და კონსტრუქციული გამოსავლის პოვნა შეძლონ. გლოვო მათი კურიერების დღევანდელ პროტესტს ოფიციალური განცხადებით ეხმაურება.

"ჩვენთვის მიუღებელია, რომ შექმნილი სიტუაციის გამო დაზარალდეს მომხმარებელი და მით უფრო, სარესტორნო ბიზნესი, რომელიც პანდემიის გამო ისედაც მძიმე მდგომარეობაშია", — აცხადებენ კომპანიაში.

კომპანიის თქმით, აცნობიერებენ, რომ ახლა ყველასთვის რთული პერიოდი დგას და ცდილობენ, მათი სოციალური პასუხისმგებლობა შექმნილი მდგომარეობის ნაწილობრივ შემსუბუქებისკენ მაინც მიმართონ, ყველაზე მოწყვლად ჯგუფებს დაუჭირონ მხარი და გაითვალისწინონ როგორც კურიერების, ისე გლოვოზე განთავსებული ობიექტებისა და მომხმარებლების მდგომარეობა.

"მუდმივი კომუნიკაცია გვაქვს პარტნიორ კურიერებთან, ვაცნობთ მათ ინფორმაციას ცვლილებებისა და საბონუსე სისტემების შესახებ. კურიერების ანაზღაურება განისაზღვრება ფიქსირებული თანხით ყველა დასრულებული შეკვეთიდან და ბონუსით, რომელიც შეკვეთების რაოდენობასა და სამუშაო საათებზეა დამოკიდებული. ჩვენი მთავარი ამოცანაა, რომ მომხმარებელმა ნებისმიერი შეკვეთა საათზე ნაკლებ დროში მიიღოს. შესაბამისად, მოთხოვნის ზრდასთან ერთად, ვზრდით კურიერების რაოდენობასაც და ვახდენთ საბონუსე სისტემის ადაპტირებას, რაც სტანდარტული პროცესია და დრო სჭირდება", — ნათქვამია ოფიციალურ განცხადებაში.

კომპანიის განცხადებით, კურიერები, რომლებიც პანდემიის დროს "ნამდვილ სუპერგმირებად" იქცნენ, გლოვოს მთავარ "მამოძრავებელ ძალას" წარმოადგენენ, ამიტომ ისინი ყოველთვის ცდილობენ მათი მოთხოვნების გათვალისწინებას.

კომპანიის ცნობით, ერთი შეხვედრა კურიერებთან უკვე გაიმართა, ხოლო მეორე 10 თებერვალსაა დაგეგმილი.

დღეს გლოვოს კურიერებმა პირობების გაუმჯობესების მოთხოვნით საპროტესტო აქცია მოაწყვეს. კომპანიის სათაო ოფისის წინ ათეულობით კურიერი იყო შეკრებილი და მოთხოვნების შესრულებას მოითხოვდა. მათ მოთხოვნებს შორის იყო მომსახურების ტარიფის გაზრდა, ობიექტებზე ლოდინის დროის შემცირება და ბონუსების სისტემის შეცვლა.