გლოვოს კურიერები პირობების გაუმჯობესების მოთხოვნით საპროტესტო აქციას აწყობენ. კომპანიის სათაო ოფისის წინ ათეულობით კურიერია შეკრებილი და მოთხოვნების შესრულებას მოითხოვს.

კურიერები მომსახურების ტარიფის გაზრდას, ობიექტებზე ლოდინის დროის შემცირებასა და ბონუსების სისტემის შეცვლას მოითხოვენ. გარდა ამისა, ისინი კომპანიის მხრიდან დამოკიდებულებითაც უკმაყოფილოები არიან.

გლოვოს კურიერებს შეკვეთისთვის ფიქსირებული 2 ლარი აქვთ, ხოლო ყოველ დამატებით კილომეტრზე 25 თეთრს იღებენ. რაც შეეხება ბონუსების სისტემას, კურიერები ამბობენ, რომ ამისთვის არარეალური რაოდენობის — 180 შეკვეთა უნდა შეასრულონ. გარდა ამისა, ისინი აღნიშნავენ, რომ ცუდ ამინდში მომსახურების დანამატს ხშირად ვერ იღებენ.

როგორც ერთ-ერთი კურიერი აცხადებს ნეტგაზეთთან, ხშირად მომხმარებლის მიერ დატოვებულ ჩაისაც აკლებენ.

"დიღომში რომ გამიუქმდეს შეკვეთა ჩემგან დამოუკიდებელი მიზეზით, მიწევს მოვიტანო [შეკვეთა] ასათიანზე ჩემი ხარჯით, და თუ ვერ მოვასწარი მე მეწერება", — აღნიშნა კურიერმა.

აქციის პარლალელურად კურიერების ნაწილს შეხვედრა ჰქონდა გლოვოს წარმომადგენლებთან. როგორც შეხვედრიდან გამოსულებმა თქვეს, კომპანიამ პირობების გაუმჯობესებისთვის დრო მოითხოვა, თუმცა ბევრისთვის ეს მიუღებელი აღმოჩნდა. ისინი ამბობენ, კომპანიისთვის ვადები აქამდეც მიუციათ, თუმცა არაფერი შეცვლილა.

მოგვიანებით კურიერებთან გლოვოს წარმომადგენელიც გავიდა და განუცხადა, რომ 10 თებერვალს ჩაინიშნა კიდევ ერთი შეხვედრა, რომელზეც ყველა პრობლემას განიხილავენ და მათზე იმუშავებენ.

"საუბრით გადაწყდა, რომ კიდევ უნდა ვისაუბროთ?" — ისმოდა შეძახილი. კურიერები აცხადებენ, რომ სამოქმედო გეგმას ახლა ითხოვენ.