კარტოგრაფების საქმეზე ბრალდებულ ივერი მელაშვილის განცხადებით, თუ ალეკო ელისაშვილს ჰქონია, რომ ქართულ ოცნებასთან მისი მოლაპარაკებების შედეგად შეუფარდეს გირაო, წავა და კვლავ ციხეში ჩაჯდება.

"მადლობა მინდა ვუთხრა ყველას, მათ შორის, ბატონ ელისაშვილსაც. ოღონდ თუ ჩემი გარეთ გამოსვლა გახდა ვიღაცის პარლამენტში შესვლის მიზანი, ეს არ ჩემში არ მოსულა. თუ უნდა მაინცდამაინც დასამტკიცებლად, წავალ და უკან ჩავჯდები, მირჩევნია ეს.

ეს მთავრობა წასასვლელია, არაფრისმაქნის, უმაქნის მთავრობასთან გვაქვს საქმე. ესენი უნდა შეიცვალონ, თუ ქვეყნის განვითარება გვინდა. პოლიტიკურ განცხადებას ვაკეთებ ახლა, მაპატიეთ. ვაანალიზებ იმას, რაც ხდება გარეთ. იმ თემაში, სადაც ჩართული ვარ, იქაც ვიცი რა ხდება. ამიტომ უვარგისები არიან, წასასვლელები არიან. ამ მიზნით ოპოზიცია გაერთიანდა ხო, არჩევნები გაგვიყალბეს, ის, ეს და გაერთიანდა, მოილაპარაკეს. ამ დროს ის განცხადება, რომ მელაშვილს გამოუშვებენ და მე გავქანდები და პარლამენტში შევალ, უკაცრავად რა, ჩემით მანიპულირება... ყველას მადლობა, მასაც ვუხდი მადლობას, თუმცა მისი პოზიცია, რომ გამოვიდა მელაშვილი და მე პარლამენტში შევიდე... თუ მაინცდამაინც ჰგონია, რომ მაინცდამაინც მისი მოლაპარაკების საგანი ვიყავი და მაგიტომ გამომიშვეს გარეთ, წავალ და ჩავჯდები რა, სადაც ვიყავი ის 4 თვე. 9 თვემდე გავძლებ ბოლო-ბოლო და 9 თვის შემდეგ ხომ გამომიშვებენ, რომ ვეღარ ნახავენ ბრალს", — განაცხადა მელაშვილმა.

ივერი მელაშვილისა და ნატალია ილიჩოვას გათვისუფლების შემდეგ, პარტია მოქალაქეების ლიდერმა, ალეკო ელისაშვილმა განაცხადა, რომ კარტოგრაფების გათავისუფლება ხელისუფლებას მოლაპარაკებების შედეგია. მანვე დააზუსტა, რომ ამ მოლაპარაკებებზე ბოლოს მხოლოდ მათი პარტია იყო დარჩენილი.

ისივე თქმით, თუ ოპოზიციას სურს, რომ გიორგი რურუაც გაათავისუფლონ, მოლაპარაკებების მაგიდას უნდა დაუბრუნდეს.

ივერი მელაშვილმა კი გათავისუფლების შემდეგ განაცხადა, რომ არ უნდა პოლიტიკური ვაჭრობის საგანი იყოს და ვინმემ მისი გათავისუფლება გამოიყენოს პარლამენტში შესასვლელად.

კარტოგრაფების საქმეზე ბრალდებული ივერი მელაშვილი და ნატალია ილიჩოვა გირაოს სანაცვლოდ გაათავისუფლეს. თბილისის საქალაქო სასამართლომ ნაწილობრივ დააკმაყოფილა პროკურატურის შუამდგომლობა, რომელიც აღკვეთის ღონისძიების შეცვლას — პატიმრობის ნაცვლად გირაოს შეფარდებას გულისხმობდა. სასამართლომ თითოეულ ბრალდებულს 20 000-ლარიანი გირაო შეუფარდა. ამასთან, დააკმაყოფილა პროკურატურის შუამდგომლობა ივერი მელაშვილის თანამდებობიდან გადაყენების შესახებ, რადგან მიიჩნია, რომ ეს თანამდებობა პირდაპირ არის კავშირში საქმეში არსებულ ინფორმაციებთან.

პროკურატურა თითოეულისთვის 30 000-ლარიანი გირაოს შეფარდებას ითხოვდა, რასაც დაცვის მხარე არ ეთანხმებოდა. ამასთან, ადვოკატები სასამართლოს ალტერნატივის სახით თავდებობას სთავაზობდნენ, თუმცა სასამართლომ არ დააკმაყოფილა.

პროკურატურის გადაწყვეტილების შესახებ სხდომის დაწყებამდე რამდენიმე წუთით ადრე გახდა ცნობილი.

მელაშვილი/ილიჩოვას გათავისუფალებას მოითხოვდნენ მათი ადვოკატებიც, რომელთა თქმით, პატიმრობაში ყოფნის არანაირი საფუძველი არ არსებობს.