პრემიერმინისტრ გიორგი გახარიას განცხადებით, დღეს უნდა დაიწყოს მსჯელობა იმაზე, რომ თუ კორონავირუსით ინფიცირების არსებული ტალღა ერთი კვირის განმავლობაში შენარჩუნდა, ეტაპობრივი გახსნა "ცოტა უფრო ადრე" დაიწყოს. ამის შესახებ მან მთავრობის სხდომაზე ისაუბრა და აღნიშნა, რომ მაჩვენებელი უკვე უახლოვდება 4%-ს. სწორედ ამ მაჩვენებლის შემთხვევაში იძლევა მთავრობა რეგულაციების შემსუბუქების პირობას. გახარიამ აღნიშნა, რომ ის საკითხი, რომელიც "თითოეულ ჩვენგანს აღელვებს" დღეს, მთავრობის ფორმატში აუცილებლად უნდა განიხილონ და ეს არის ის, თუ როგორ უნდა მოახერხონ "რაც შეიძლება სწრაფად, მაგრამ უსაფრთხოდ და გონივრულად, ეტაპობრივად" დაიწყონ ეკონომიკის გახსნა.

"როგორც ჩანს, დღევანდელი ტენდენციები გვაძლევს ფრთხილი ოპტიმიზმის საშუალებას. ამიტომ ჩვენ დღეს უნდა დავიწყოთ მსჯელობა იმაზე, თუ მსგავსი ტენდენცია შევინარჩუნეთ უახლოესი ერთი კვირის განმავლობაში, ისე როგორც გავაკეთეთ ზაფხულში, ეტაპობრივი გახსნა ცოტა უფრო ადრე დავიწყოთ", — თქვა გახარიამ.

მან ასევე აღნიშნა, რომ პირველ რიგში ეს შეეხება თბილისს, ქუთაისსა და რუსთავს და კერძოდ, საგანმანათლებლო დაწესებულებებს, რასაც "თან ერთვის" მუნიციპალური ტრანსპორტის ამოქმედებაც.

"მივცეთ ჩვენს ბავშვებს შესაძლებლობა, კლასებში დაიწყონ სწავლა. რა თქმა უნდა, ამას თან ერთვის მუნიციპალური ტრანსპორტის ამოქმედებაც და ამაზე უნდა ვიმსჯელოთ ეტაპობრივად, ისე, რომ რისკის ქვეშ არ დავაყენოთ ის მიღწევა ეპიდემიის მართივის, რომელიც როგორც ფაქტი, დღეს ჩვენ გვაქვს ბოლო ორი თვის ერთობლივი მუშაობის და შრომის შედეგად. რაც მთავარია, ყველაფერი უნდა გავაკეთოთ იმისთვის, რომ ეს მიღწევა სტაბილურად შევინარჩნოთ, სანამ ეტაპობრივად და უფრო აქტიურად არ დავიწყებთ ტურიზმის გახსნას", — განაცხადა გახარიამ.

დღესვე, გიორგი გახარიამ განაცხადა, რომ მთავრობა იმსჯელებს, ინფიცირების არსებული მაჩვენებლის შემთხვევაში, ეტაპობრივი გახსნა "ცოტა უფრო ადრე" დაიწყოს.