შინაგან საქმეთა სამინისტროს მომსახურების სააგენტოს ცნობით, მოქალაქეები სატრანსპორტო საშუალების მართვის უფლების მისაღებ თეორიულ და პრაქტიკულ გამოცდებზე გასვლას პირველი თებერვლიდან შეძლებენ. მათივე თქმით, ყველა სახის შეზღუდული სერვისი პირველი თებერვლიდან განაგრძობს ფუნქციონირებას. მათ შორის ცეცხლსასროლი იარაღის რეგისტრაციასთან დაკავშირებული პროცედურები და მომსახურების სააგენტოს სტრუქტურული ერთეულის ფარგლებს გარეთ მექანიკური სატრანსპორტო საშუალებების დათვალიერება პირველი თებერვლიდან აღდგება.

"ასევე, დროებით შეჩერებული იქნება სერვისების მიწოდება ახალქალაქისა და ამბროლაურის სერვისცენტრებში", — აცხადებენ მომსახურების სააგენტოში.

მათივე თქმით, ამ ეტაპზე, შემდეგ რეჟიმში განაგრძობს მუშაობას:

  • მოქალაქეებს საშუალება აქვთ, მომსახურების სააგენტოს მიმართონ სატრანსპორტო საშუალების განბაჟების, რეექსპორტის, ექსპორტისა და რეგისტრაციის პროცედურების განსახორციელებლად მხოლოდ ორშაბათს, ოთხშაბათს, პარასკევსა და შაბათს;
  • მომსახურების სააგენტოს მიერ გასაცემ ცნობებთან დაკავშირებით განაცხადის მიღება შესაძლებელია მხოლოდ ელექტრონული წესით, მონაცემთა სუბიექტის მიერ, მომსახურების სააგენტოს ვებგვერდის საშუალებით (sa.gov.ge);
  • მომსახურების ცენტრებში მზა დოკუმენტი გაიცემა განაცხადის შევსებისას მითითებულ სტრუქტურულ ერთეულში, კვირის შემდეგ დღეებში: ორშაბათს, ოთხშაბათს, პარასკევსა და შაბათს.

მომსახურების სააგენტო მოქალაქეებს მოუწოდებს, გადაუდებელი აუცილებლობის გარდა, სააგენტოს სერვისცენტრებში ვიზიტისგან თავი შეიკავონ, ხოლო საჭიროების შემთხვევაში, ადგილზე სერვისების მისაღებად პირბადით, თანმხლები პირების გარეშე გამოცხადნენ.