დაავადებათა კონტროლის ცენტრის დირექტორის მოადგილის, პაატა იმნაძის განცხადებით, საქართველოში კორონავირუსის ახალი შტამის 1 დადასტურებული შემთხვევა ჯერჯერობით აფეთქების მომასწავებელი არ არის და ამ შტამის მიმდინარეობა ძველი შტამების სიმძიმისგან არაფრით განსხვავდება.

"ჯერ ახალი შტამის აფეთქებას რატომ ველოდებით არ ვიცი, რადგან ჯერჯერობით ბრიტანეთში სამხრეთში და ლონდონშია მარტო და ახალმა შტამმა ჩაანაცვლა მოცირკულირე შტამები. სხვა ქვეყნებში ახალი შტამის აფეთქება ჯერ აღწერილი არ არის. ერთი შემთხვევა, რომელიც ჩვენ გვაქვს გამოვლენილი, არა მგონია, ჯერჯერობით რაიმე აფეთქების მომასწავებელი იყოს, მით უმეტეს, რომ მისი მიმდინარეობა არაფრით განსხვავდება ძველი შტამების სიმძიმისგან", — განაცხადა იმნაძემ.

4 დეკემბერს საქართველოში კორონავირუსის ახალი შტამი დადასტურდა. დაავადებათა კონტროლის და საზოგადოებრივი ჯანმრთელობის ეროვნული ცენტრის (NCDC) ინფორმაციით, სულ კვლევაში სამი საეჭვო შემთხვევა იყო, რომელთაგან ორში შტამის არსებობა არ დადასტურდა. ხოლო ერთ, დეკემბრის თვეში აღებულ ნიმუშში, ახალი "ბრიტანული" შტამის S გენისათვის დამახასიათებელი მუტაცია გამოვლინდა.

NCDC-ის ცნობით, პაციენტი 50 წელს გადაცილებული მამაკაცია, რომლის მდგომარეობა დამაკმაყოფილებელია და თვითიზოლაციაში იმყოფება. გამოვლენილია ინფიცირებულთან კონტაქტებიც.