დაავადებათა კონტროლის ცენტრის დირექტორის, ამირან გამყრელიძის განცხადებით, კორონავირუსის ახალ შტამზე საქართველოში რამდენიმე საეჭვო შემთხვევას იკვლევენ. მისი თქმით, ამ პროცესს რამდენიმე დღე სჭირდება და პასუხი შემდეგ ეცოდინებათ.

"რამდენიმე შემთხვევას ვიკვლევთ, დიახ, საეჭვო შემთხვევებია. იქ, სადაც ეს გენი არ იყო იმ შემთხვევებსაც ვიკვლევთ და მიმდინარეობს რამდენიმე ნიმუშის სეკვენირება. ამას რამდენიმე დღე სჭირდება იმ სეკვენატორებზე, რაც ჩვენ გვაქვს. სეკვენირება ნიშნავს გენის დაშლას ნუკლეოტიდებამდე და შემდგომ შედარებას, არის თუ არა მუტაცია მის გენომში. საკმაოდ რთული სამუშაოა", — განაცხადა მან პირველი არხის ეთერში.

საუბარია კორონავირუსის ახალ შტამზე, რომელიც ამჟამად დიდი ბრიტანეთის ნაწილში ცირკულირებს. გამყრელიძის თქმით, ახალი შტამი უფრო მარტივად გადამდები, მაგრამ ნაკლებად ვირულენტურია, ანუ უფრო სუსტია.

25 დეკემბრის მონაცემებით, საქართველოში კორონავირუსის 1 881 ახალი შემთხვევა დადასტურდა, გამოჯანმრთელდა —1 515 პირი, გარდაიცვალა — 37 ადამიანი. გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 218 724-ს, გამოჯანმრთელებულია 196 220, გარდაიცვალა 2 313.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: