ლელოს ოფისში ოპოზიციის მორიგი შეხვედრის შემდეგ, ევროპული საქართველოს ერთ-ერთმა ლიდერმა, გიგი უგულავამ განაცხადა, რომ პლებისციტი, შესაძლოა, მხოლოდ რიგგარეშე არჩევნებამდე მისასვლელი გზა იყოს.

"ისინი [ქართული ოცნება] მოქმედებენ სიტუაციის მიხედვით და სიტუაცია მათთვის აბსოლუტურად არასახარბილეოა იმიტომ, რომ ჩვენ ყველა სხვა კრიზისის პარალელურად შევდივართ იმ ღრმა კრიზისში, რასაც ჰქვია პოლიტიკური დეგრადაცია. პლებისციტი ვერ და არ იქნება რიგგარეშე არჩევნების შემცვლელი. პლებისციტი, შესაძლოა, იყოს მხოლოდ რიგგარეშე არჩევნებამდე მისასვლელი გზა", — განაცხადა გიგი უგულავამ.

გიგი უგულავამ განაცხადა, რომ პლებისციტი შეიძლება იყოს შუალედური გზა რიგგარეშე არჩევნებამდე მისასვლელად. ლეიბორისტული პარტიის ლიდერს, შალვა ნათელაშვილს პლებისციტი ზედმეტად მიაჩნია, მაგრამ, რადგან ოპოზიცია ამ საკითხს განიხილავს, არ აპირებს შეწინააღმდეგებას. ეკა ბესელია მიიჩნევს, რომ არჩევნების საკითხზე პლებისციტის ჩატარება დროის გაყვანა და ქართული ოცნების თამაშია.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

გაიგეთ მეტი: