საქართველოს ჯანდაცვის მინისტრის მოადგილე, თამარ გაბუნია ამბობს, რომ 3 დეკემბრის მონაცემებით, ქვეყნის მასშტაბით თავისუფალი საწოლების რაოდენობა 538-ია. აქედან კი, ყველაზე მეტად თბილისის საწოლფონდია დატვირთული.

"პაციენტების ნაკადების მართვა მარტივი არ არის, მაგრამ არც იმის პრობლემა დგას, რომ მძიმე პაციენტი კლინიკაში მოხვდეს. კლინიკები 90-95%-იან დატვირთვაზე მუშაობენ", — განაცხადა გაბუნიამ.

მისივე თქმით, დღევანდელი მდგომარეობით ქვეყნის მასშტაბით 7 103 საწოლია მობილიზებული. დილის 09:00 საათის მდგომარეობით კი, დატვირთულია — 6 329. აქედან ტრიაჟის, ანუ შეფასების პროცესში 255 პაციენტი იმყოფება. მინისტრის მოადგილის ინფორმაციით, ინტენსიური საწოლი 1 243-ს და ხელოვნური ვენტილაცია 378 პაციენტს სჭირდება.