ფეისბუქის მომხმარებელი კახა კერესელიძე სოციალურ ქსელში საფულის და წერილის ფოტოს აქვეყნებს. ის წერს, რომ საფულე, რომელშიც თანხა დევს, ორთაჭალაში, სავარაუდოდ "ბაიკერს" ამოუვარდა, თავად მას ვერ დაეწია, საფულეში კი არ დევს რამე სახის დოკუმენტი, რომლითაც პატრონის იდენტიფიცირებას შეძლებს.

სამაგიეროდ, მასში დევს წერილი, რომელსაც შვილი რეგიონში მცხოვრებ დედას უგზავნის:

"დედა, ვერ გირეკავ ხოლმე, მანდ რომ არ იჭერს ბილაინი. მაგთის ნომერს გიგზავნი, ჩართე, თუ ამანაც არ დაიჭირა, სხვა რა ვიცი. გიგზავნი 300 ლარს, მეტი არ დამრჩა ხელფასიდან და დროებით გეყოფა. თუ მოვახერხე, ჩამოვალ თვის ბოლოს".

ფოტო: კახა კერესელიძე / Facebook

მოგვიანებით კახამ პოსტის კომენტარში დაწერა, რომ დაუკავშირდა მოტოციკლის მძღოლი, რომელმაც იმ დროს ორთაჭალაში გაიარა, მაგრამ ის ამანათის მფლობელი არ აღმოჩნდა. ის მომხმარებლებს სთხოვს, რომ თუ ნივთი მათ არ ეკუთვნის, ნუ გამოეხმაურებიან:

"რეალურმა პატრონმა მითხრას, რა წერია პატარა ფურცელზე და აღმიწეროს საფულე, შიგნიდან როგორია და რა დევს. თაღლითები ნუ გამომეხმაურებით".

ფეისბუქპოსტი ქსელში ელვისსისწრაფით გავირუსდა, მას ამ დროისთვის 24 ათასი გაზიარება აქვს. მომხმარებლები წერილის და დედისთვის განკუთვნილი ამანათის პატრონს საერთო ძალებით ეძებენ.