პარტია პროგრესული საქართველოს ერთ-ერთ ლიდერთან, გიორგი კვაბზირიძესთან გვიან ღამით უცნობი პირი მივიდა და პოლიტიკიდან წასვლა მოსთხოვა. კვაბზირიძის თქმით, იყო გასროლაც.

"გამოვედი ოფისიდან, ჩავჯექი მანქანაში, დავძარი, შემდეგ რაღაც ესემესი მომივიდა, გავჩერდი და გავიგონე ასეთი ხმა — "პოლიტიკას შეეშვი, ბიჭო". იყო ერთი გასროლა, სავარაუდოდ, შეშინების მიზნით", — განაცხადა კვაბზირიძემ.

გიორგი კვაბზირიძემ აღნიშნა, რომ მომხდარი ფაქტი იყო მესიჯი, რომელზეც მისი პასუხია, რომ არ აპირებს პოლიტიკას შეეშვას არც თავად და არც მისი გუნდი.

შინაგან საქმეთა სამინისტროს ცნობით, საქმეზე გამოძიება საქართველოს სისხლის სამართლის კოდექსის 236-ე მუხლით მე-3 და მე-4 ნაწილით მიმდინარეობს, რაც გულისხმობს, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღებას.