ცენტრალური საარჩევნო კომისია თვითიზოლაციაში მყოფ ამომრჩევლებს მიმართავს, დარეკონ ცესკოს სატელეფონო-საინფორმაციო ცენტრში და მოითხოვონ გადასატანი საარჩევნო ყუთი.

ცესკოს განცხადებით, მათი სატელეფონო-საინფორმაციო ცენტრი მესამე დღეა მუშაობს. მათივე თქმით, შესაბამისი უწყების მიერ გადმოცემული მონაცემების მიხედვით, 25 ოქტომბრის მდგომარეობით დაახლოებით 9 000-მდე პირია ბაზაში რეგისტრირებული, რომლებიც არიან საარჩევნო ასაკის მქონე და კენჭისყრის დღისთვის თვითიზოლაციაში იქნებიან. ამასთანავე, ცესკოს თქმით, ეს მონაცემები 26 ოქტომბრის მდგომარეობით დამატებით განახლდება.

ცენტრალური საარჩევნო კომისიის ინფორმაციით, მოცემული დროისთვის გადასატანი საარჩევნო ყუთის მოთხოვნით ცესკოს სატელეფონო-საინფორმაციო ცენტრს 1 500-ზე მეტმა ამომრჩეველმა მიმართა და ზარების მიღება ახლაც გრძელდება.

ცესკომ შესაბამისი უწყების მონაცემთა ბაზაში რეგისტრირებულ 7 000-მდე ამომრჩეველს გაუგზავნა სატელეფონო შეტყობინებები. აღსანიშნავია, რომ სატელეფონო შეტყობინება ეგზავნება ყველა პირს, რომელთაც მითითებული აქვთ საკონტაქტო ინფორმაცია.

გაიგე მეტი: