პარტია რეფორმერსა და ორგანიზაცია უშუალო დემოკრატიულ მოძრაობის ეროვნულ კომიტეტს შორის ურთიერთანამშრომლობის მემორანდუმი გაფორმდა.

პარტია რეფორმერის თავმჯდომარის, თორნიკე ჯანაშვილის განცხადებით, თანამშრომლობა მოიცავს მოქალაქეების სრულ ჩართულობას პოლიტიკურ პროცესებში, რაც პარტია რეფორმერის მთავარი იდეოლოგიაა.

"ჩვენ გვაქვს იდეოლოგიური თანხვედრა, ხედვა მთავარ საკითხებზე, რომელიც უპირველესად მოიცავს საქართველოს მოქალაქეების მაქსიმალურ ჩართულობას ქვეყანაში მიმდინარე პროცესებში. ჩვენ უნდა შევცვალოთ არსებული პოლიტიკური ისტაბლიშმენტი, რომელიც წლებია მართავს ქვეყანას, ეს ადამიანები უნდა ჩამოშორდნენ პროცესებს და ქვეყანა უნდა მართოს ახალმა ძალამ, რომელიც რეალურად დაფუძნებული იქნება ხალხზე", — განაცხადა თორნიკე ჯანაშვილმა.

უშუალო დემოკრატიული მოძრაობის ეროვნულ კომიტეტის ერთ-ერთი მთავარი იდეა რეფერენდუმის წესით კანონის მიღების ან გაუქმების შემოღებაა. ამ ინიციატივით უშუალოდ ხალხს ეძლევა ბერკეტი აქტიურად ჩაერიოს მთავრობის საქმიანობაში, დაბლოკოს ხალხისთვის ყველა არასასურველი კანონი. კანონპროექტი უკვე მომზადებულია, მის განსახორციელებლად მხოლოდ პოლიტიკური ნებაა საჭირო.

როგორც რეფორმერში აცხადებენ, ამ ინიციატივით შესაძლებელია რეფერენდუმის წესი გამოყენებული იყოს ქვეყნისთვის მნიშვნელოვანი გადაწყვეტილებების შესახებ კანონების მიღებისას. ეს ეხება ყველა კანონს, რომელიც არაა განსაზღვრული კონსტიტუციით ან საერთაშორისო კონვენციებით, მაგალითად საერთაშორისო ურთიერთობებს, ქვეყნის საგარეო კურსს და ა.შ.

"ჩვენი პარტია იქნება იმ იდეების გამტარი, რაც უშუალო დემოკრატიულ მოძრაობას აქვს. ეს პლატფორმა არის პარტია რეფორმერის მხარდამჭერი საერთო იდეოლოგიიდან და მიზნებიდან გამომდინარე", — აცხადებს თორნიკე ჯანაშვილი.