არაფერია იმაზე საყვარელი, ვიდრე ძაღლი, რომელიც თავის საუკეთესო მეგობარს ეხუტება. მაგრამ იცოდით, რომ ძაღლებს ხანგრძლივი მეგობრობა მხოლოდ ადამიანებთან არ შეუძლიათ? თუ არ იცოდით, ესე იგი, ჯერ ბარლის არ იცნობთ.

ბარლი 2.5 წლის ოქროსფერი რეტრივერია ამსტერდამიდან, რომელიც თავის Instagram-ის ანგარიშზე @barleyboy უკვე 145 ათას გამომწერს ითვლის.

ბარლის ყველაზე ერთგული მეგობარი ჰყავს — ფუმფულა სათამაშო ცუგა, რომელსაც გვერდიდან არასდროს იშორებს.

ბარლისთან ერთად სახლში მისი პატრონები, ზიტა და მარკი, და, რა თქმა უნდა, მისი ციცქნა მეგობარი — ოქროსფერი რეტრივერი თოჯინა, სახელად ფლაფი — ცხოვრობენ. თავისუფლად შეიძლება ითქვას, რომ მათი მეგობრობა სხვებისას არ ჰგავს.

ლეკვი და სათამაშო ცხოველი პირველივე დღიდან განუყოფელნი იყვნენ. "ბარლის ჩვენთან სახლში მოყვანის პირველივე დღიდან ჰყავდა ფლაფი. პირველად რომ შეხვდნენ, ფლაფი ბარლიზე უფრო დიდი იყო. ერთად გაიზარდნენ", — თქვა ძაღლის პატრონმა.

როცა ვამბობთ, გვერდიდან არ იშორებსო, ამას მართლა ვგულისხმობთ:

"ბარლის ფლაფი ყვეეეელგან თან დაყავს! ყოველ დილით ბარლი იღვიძებს და ჩვენს საწოლზე ხტება ფლაფისთან ერთად. შემდეგ ბარლის ის დილის გასეირნებაზე გაყავს. მთელ დღეს ერთად ატარებენ, ძალიან საყვარლები არიან.

ყოველ ჯერზე, როცა სახლში ვინმე მოდის, ბარლის ფლაფი აყავს და შესაგებებელ საჩუქრად მიაქვს თან. რამე ხმაური თუ ისმის ან მტვერსასრუტი ირთვება, მაშინვე ფლაფის დაიტაცებს, უფრო უსაფრთხოდ რომ იგრძნოს თავი. ფლაფის საწოლშიც იწვენს, ბანაობისასაც თან მიყავს და, მეტსაც გეტყვით, მოშარდვა თუ მოუნდა, მაინც ფლაფისთან ერთად გადის!

ძაღლი და სათამაშო ცუგა ერთსა და იმავე პროცედურებსაც კი გადიან! "რამდენიმე კვირის წინ ბარლი დავკოდეთ და მთელი კვირა ვეტერინარიული კონუსის ტარება მოუწია. ისე შეგვეცოდა, რომ კონუსი ფლაფისაც ვუყიდეთ. ამან ბარლი აშკარად უფრო გააბედნიერა", — ამბობს ძაღლის პატრონი.

აშკარაა, რომ ბარლის რაღაც გამორჩეული ურთიერთობა აქვს ფლაფისთან — არა მხოლოდ იმიტომ, რომ მან სათამაშო ცუგა თავის განუყრელ მეგობრად აქცია, რომელიც მის გვერდს არასდროს ტოვებს, არამედ იმიტომაც, რომ ბარლი, ზოგადად, ცნობილია იმით, რომ ყოველთვის ყველაფერს ამტვრევს და ანადგურებს ხოლმე, მაგრამ თავისი პაწია მეგობრისადმი ის ძალიან მზრუნველია.

"ზოგჯერ სათამაშო პანდასთანაც ატარებს დროს. ფლაფის ცოტა უფრო დიდი ძამიკოც ჰყავს, მაგრამ ბარლის ის დიდად არ აინტერესებს. მეტიც, ბარლიმ თავისი ყველა სათამაშო დაბრდღვნა, მაგრამ ფლაფის თითსაც არასდროს აკარებს. ის მასზე ძალიან ზრუნავს და უცნაურიც კია, იმდენად უყვარს", — დაამატა ბარლის პატრონმა.