მსახიობსა და პირველ ავღანელ ქალ კინორეჟისორს, საბა საჰარს, ქვეყნის დედაქალაქ ქაბულში ესროლეს.

44 წლის ხელოვანი საავადმყოფოში გადაიყვანეს, თუმცა, თავდაპირველად, გაურკვეველი იყო, რა სახის ჭრილობა ჰქონდა მიყენებული მას.

როგორც საჰარის ქმარი, ემალ ზაკი, აცხადებს, რეჟისორი სამშაბათს სამსახურში მიდიოდა, როცა სამმა მსროლელმა ცეცხლი გაუხსნა მის მანქანას, თუმცა თავდასხმაზე პასუხისმგებლობა არცერთ ტერორისტულ ჯგუფს არ აუღია.

როგორც ზაკი აცხადებს, სროლა ქაბულის დასავლეთით მოხდა, მანქანაში კი ხუთი ადამიანი იმყოფებოდა — საჰარი, მისი დაცვის ორი წევრი, ბავშვი და მძღოლი. დაცვის ორივე წევრი ასევე დაიჭრა, მძღოლი და ბავშვი კი უვნებლად გადარჩნენ.

ემალ ზაკი და საბა საჰარი.

ფოტო: Emal Zaki

ზაკის თქმით, სროლის ხმა მან საჰარის სახლის დატოვებიდან ხუთ წუთში გაიგო, ტელეფონზე დარეკვისას კი მან უთხრა, რომ ესროლეს და მუცლის მიდამოში იყო დაჭრილი.

"დახმარება პირველად საბას აღმოვუჩინეთ, ჯერ საავადმყოფოში გადავიყვანეთ, შემდეგ კი პოლიციის განყოფილებაში წავედით", — ამბობს ზაკი.

მისი თქმით საჰარის ოპერაციამ წარმატებით ჩაიარა.

ფოტო: REUTERS

საჰარი ავღანეთში ერთ-ერთი ყველაზე ცნობილი მსახიობი, რეჟისორი და ქალთა უფლებებისთვის მებრძოლი აქტივისტია. თუმცა, ამავდროულად, იგი პოლიციის ოფიცერიცაა და ამჟამად ქვეყნის შინაგან საქმეთა სამინისტროში მუშაობს. მისი შექმნილი კინონამუშევრებიც, მეტწილად, სამართალსა და კორუფციას შეეხება.

მომხდარს გამოეხმაურა ადამიანის უფლებების დამცველი საერთაშორისო ორგანიზაცია Amnesty International, რომლის განცხადებითაც ავღანეთში "საგანგაშოდ" გაიზარდა თავდასხმები კინორეჟისორებზე, პოლიტიკურ აქტივისტებსა და ადამიანის უფლებადამცველებზე.