მსოფლიოს რამდენიმე ქვეყანაში ადამიანებს ჯერ კიდევ არ შეუძლიათ, კინოთეატრებს ესტუმრონ, თუმცა ამერიკელი მსახიობი ტომ კრუზი უკვე მოუწოდებს კინომოყვარულებს, საყვარელ ადგილს დაუბრუნდნენ.

ტვიტერზე გამოქვეყნებულ ვიდეოში კრუზი კრისტოფერ ნოლანის Tenet-ის ჩვენებაზე მიემართება და აცხადებს, რომ იგი "კინოს უბრუნდება".

ვიდეოში კრუზს მუდმივად უკეთია პირბადე, თუმცა მის ნიღაბს სავენტილაციო ხვრელიც აქვს დატოვებული, რაც აშშ-ის დაავადებათა კონტროლისა და პრევენციის ცენტრის განცხადებით მიზანშეწონილი არაა, რადგან ასეთი პირბადე ვირუსის პოტენციურ მატარებელს მისი გავრცელების საშუალებას აძლევს.

ჩვენების ბოლოს კრუზი აცხადებს, რომ "იგი მოხარულია კინოთეატრში დაბრუნებით", ფილმის შეფასებისას კი დასძენს, რომ "ძალიან მოეწონა" ნოლანის კინონამუშევარი.

ბოლო ფილმი, რომელშიც ტომ კრუზი მონაწილეობს, Top Gun: Maverick არის. 1986 წლის საკულტო ფილმის გაგრძელების პრემიერა პანდემიის გამო ორჯერ გადაიდო — ჯერ 2020 წლის დეკემბრამდე, ხოლო შემდეგ 2021 წლის ივლისამდე. ფილმში კრუზთან ერთად მაილს ტელერი, ჯენიფერ კონელი და ჯონ ჰემი მონაწილეობენ, მისი რეჟისორი კი ჯოზეფ კოსინსკია.

რაც შეეხება საქართველოს, დღეს გახდა ცნობილი, რომ კინოთეატრები 15 სექტემბრიდან, თეატრები კი პირველი ოქტომბრიდან გაიხსნება.