იურისტის თქმით, აშშ-ში ახალგაზრდა გოგომ, რომელიც გარდაცვლილად იყო გამოცხადებული, დამკრძალავ ბიუროში თვალები მაშინ გაახილა, როცა მის ბალზამირებას აპირებდნენ.

"სიმართლე თუ გაინტერესებთ, ისინი მალე მისი სისხლის ამოტუმბვას დაიწყებდნენ", — თქვა ოჯახის დაქირავებულმა იურისტმა ჯეფრი ფიგერმა.

საუთფილდის სახანძრო სამსახურმა აღიარა, რომ კვირას, 23 აგვისტოს, ისიც მონაწილეობდა მოვლენათა იმ მეტად უჩვეულო წყებაში, რომელიც იმით დაიწყო, რომ ექიმების ბრიგადა გამოიძახეს სახლში, რომელშიც 20 წლის გოგო ტაიმეშა ბოშანი უგონოდ იყო და არაფერზე რეაგირებდა.

განყოფილების თქმით, პირველადი სამედიცინო დახმარების მუშაკები 30 წუთის განმავლობაში ცდილობდნენ მის გონზე მოყვანას და სასწრაფო დახმარების ექიმთანაც გადიოდნენ კონსულტაციას. ექიმმა სცენიდან "მიღებულ სამედიცინო ინფორმაციაზე დაყრდნობით პაციენტი გარდაცვლილად გამოაცხადა".

სახანძრო განყოფილების ცნობით, ოკლენდის ოლქის სასამართლო-სამედიცინო ექსპერტიზის ოფისმა განაცხადა, რომ ცხედრის ოჯახისთვის გადაცემა გაკვეთის გარეშე შეიძლებოდა. მიუხედავად ამისა, დეტროიტის დამკრძალავ ბიუროში განმაცვიფრებელი რამ მოხდა: ერთ საათზე მეტის შემდეგ გოგო ისევ ცოცხალი იყო.

"ჩვენმა თანამშრომლებმა დაადასტურეს, რომ ის ისევ სუნთქავდა", — თქვა დამკრძალავმა ბიურომ და სასწრაფო სამედიცინო დახმარებას გამოუძახა.

"ყველაზე შემზარავი ისაა, რომ გოგოს თვალები რომ არ ჰქონოდა გახელილი, ისინი მის ბალზამირებას აპირებდნენ... პირდაპირი მნიშვნელობით, ტაიმეშას ამბავი ასე იყო: დამკრძალავ ბიუროში მისი ცხედრის ტომარა გახსნეს და დაინახეს, რომ თვალგახელილი და ცოცხალი იყო", — თქვა ფიგერმა.

დეტროიტის სამედიცინო ცენტრის წარმომადგენლის, ბრაიან ტეილორის, თქმით, გოგო ორშაბათ საღამოს, 24 აგვისტოს, კრიტიკულ მდგომარეობაში იყო.

"გული ძალიან დამძიმებული მაქვს. ვიღაცამ ჩემი შვილი მკვდრად შერაცხა მაშინ, როცა ის ცოცხალი იყო", — თქვა გოგოს დედამ.

საუთფილდში განაცხადეს, რომ შიდა გამოძიება იწარმოება, თუმცა, მათი თქმით, სახანძრო და პოლიციის განყოფილებები დადგენილ პროცედურას მიყვებოდნენ.