სათამაშოების მწარმოებელმა ხაზმა American Girl-მა იმ ხუთ ადამიანს გაუკეთა სიურპრიზი, რომლებმაც კორონავირუსის პანდემიის წინააღმდეგ ბრძოლაში ძალისხმევა არ დაიშურეს. კომპანია Mattel-ის ქვებრენდმა პანდემიის გმირების გამოსავლენად ამერიკელ ბავშვებში გამოკითხვა ჩაატარა და შერჩეულ 5 გმირზე თოჯინა შექმნა.

გამარჯვებულებმა საჩუქრად თოჯინის მსგავსი ტანისამოსი, მათზე შექმნილი თოჯინა და $200-იანი ვაუჩერი მიიღეს.

შერჩეული გმირებიდან ერთ-ერთია აპრილ ო'ქუინი, რომელიც ამბობს, რომ სიაში მოხვედრა მისთვის დიდი პატივია. ის მედიკოსია, რომელიც პანდემიის დროს წინა ხაზებში მუშაობდა.

"ქალი მედიკოსების წარმომადგენლად ჩემი შერჩევა უდიდესი პატივია. ხალხს ზოგჯერ ჩვენი შრომა ავიწყდება, თუმცა ახლა ამ აღიარებით ყველა ჩვენგანი უზომოდ გახარებულია", — ამბობს ის.

ფოტო: RAA

39 წლის აპრილს სასწრაფო სამედიცინო დახმარების სამსახურში მუშაობის 15-წლიანი გამოცდილება აქვს. პანდემიის დროს, ის თავადაც დაინფიცირდა კორონავირუსით, თუმცა გამოჯანმრთელების შემდეგ დაუყოვნებლივ დაბრუნდა სამსახურში.

Mattel-ის კონკურსში გმირები ბავშვებმა წარადგინეს და მათზე ისტორიები კომპანიას წერილობით გაუგზავნეს. აპრილი საკუთარმა დის შვილმა წარადგინა.

5 გმირს შორის ასევე არიან:

  • ხავიერი — 17 წლის მაღაზიის გამყიდველი, რომელიც პანდემიის დროს კვირაში 5 დღეს მუშაობდა, იმის მიუხედავად, რომ ასთმა ჰქონდა;
  • პემი — მასწავლებელი, რომელიც მოსწავლეებმა წარადგინეს. ის პანდემიის დროს ყველა მოსწავლის სახლთან გაჩერდა, გაამხნევა და წიგნებით სავსე ჩანთები დაუტოვა;
  • სარა — ექთნის ასისტენტი, რომელიც შვილიშვილმა წარადგინა. ის საკუთარი სამსახურის გარეთაც "მუშაობდა": უსახლკაროებსაც ეხმარებოდა, მათზე საკვებით ზრუნავდა და ჯანმრთელობას უმოწმებდა;
  • ლორენი — პილოტი, რომელმაც მოხალისეობა გამოიჩინა და ამერიკელი ექიმების გუნდი ჰაიტიზე გადააფრინა, რათა მოქალაქეებს კორონავირუსთან ბრძოლაში დახმარებოდა. მან სხვა ქვეყანაში დარჩენილი ამერიკის მოქალაქეებიც დააბრუნა სახლში.