ამერიკელი დრეგ ქუინი ჩი ჩი დევეინი, რომელიც მრავალმა მაყურებელმა ცნობილ სატელევიზიო შოუში RuPaul's Drag Race გაიცნო და შეიყვარა, 34 წლის ასაკში გარდაიცვალა.

ჩი ჩი, რომლის არასასცენო სახელი-გვარიც ზეივიონ დავენპორტია, RuPaul's Drag Race-ის მერვე სეზონში, 2016 წელს გამოჩნდა, შემდეგ კი 2018 წელს მონაწილეობა მიიღო ამავე შოუს სპინოფ პროექტში RuPaul's Drag Race All Stars.

BBC-ის ინფორმაციით, ჩი ჩი დევეინმა გასულ კვირას სოციალურ ქსელებში გაავრცელა ინფორმაცია, რომ წელს უკვე მეორედ ჯანმრთელობის გართულებული მდგომარეობის გამო კლინიკაში მკურნალობდა: მას 2018 წელს იშვიათი ავტოიმუნური დაავადება სკლეროდერმა დაუდგინდა.

ამ სამწუხარო ფაქტს გამოეხმაურა მსოფლიოში ერთ-ერთი ყველაზე ცნობილი დრეგ ქუინი რუპოლი:

"გულმოკლული ვარ ჩი ჩის გარდაცვალების გამო. მადლიერი ვარ, რომ მისი სიკეთისა და საოცარი შინაგანი სამყაროს ხილვის შესაძლებლობა მოგვეცა. ის მოგვენატრება, მაგრამ არასდროს დავივიწყებთ", — ვკითხულობთ ტვიტერზე გამოქვეყნებულ პოსტში.

რუპოლთან ერთად ჩი ჩის პატივი მიაგეს სხვა დრეგ ქუინებმაც: "გამორჩეული ქუინი, რომელიც ჩვენს ინდუსტრიაში უკლებლივ ყველას უყვარდა და ეს ყოველთვის ასე იქნება", — წერს ტრიქსი მატელი.

დევეინის გარდაცვალებას გამოეხმაურა RuPaul's Drag Race-ის მეექვსე სეზონის გამარჯვებული, ბიანკა დელ რიო.

ჩი ჩის დრეგ კულტურის მოყვარულები თავისი განსაკუთრებული ხასიათის გამო აფასებდნენ, ამავდროულად კი მას ერთ-ერთ გამორჩეულ Lip sync შემსრულებლად მიიჩნევდნენ.

ასევე იხილეთ: