აუქციონისტის საფოსტო ყუთში გატარებული უქმეების შემდეგ, ინდოელი საზოგადო მოღვაწის, მაჰათმა განდის სათვალე მალე გასაყიდად გამოჩნდება.

East Bristol Auctions-ის თანამშრომლებმა მოკრძალებულ კონვერტში მოთავსებული სათვალე წინა კვირას იპოვეს.

როგორც აუქციონისტი ენდრიუ სტოუ ამბობს, ნივთი, რომლის ღირებულებაც 15 ათას გირვანქა სტერლინგს (60 ათასი ლარი) აღემატება, კომპანიის არსებობის ისტორიაში ყველაზე მნიშვნელოვანი მონაპოვარია.

მისი თქმით, სათვალის მფლობელს "ლამის გულმა დაარტყა", როცა ნივთის ღირებულება შეიტყო.

"ვიღაცამ ჩვენს საფოსტო ყუთში მოათავსა პარასკევს და ორშაბათამდე იქ მოუწია დროის გატარება", — ამბობს სტოუ.

"როცა ჩემმა ერთ-ერთმა თანამშრომელმა ნივთი გადმომცა, ბარათიც თან მოაყოლა, სადაც ეწერა, რომ ეს განდის სათვალე იყო. მე კი, უბრალოდ, ვთქვი, რომ საინტერესო რაღაცა იყო და სამუშაო დღე განვაგრძე".

ადამიანის უფლებებისთვის მებრძოლი ინდოელი მოღვაწე "საკუთარი ნივთების გაჩუქებითაც იყო ცნობილი".

ფოტო: Public Domain

თუმცა, როგორც სტოუ დასძენს, ნივთის შესწავლის შემდეგ ლამის "სკამიდან გადმოვარდა", როცა შეიტყო, რომ ამ მოოქროვილ, მრგვალ ბუდეში ჩასმულ სათვალეს თავის დროზე ცნობილი ინდოელი სამოქალაქო აქტივისტი ატარებდა.

"როცა ამის თაობაზე მფლობელს დავურეკე, ლამის გულმა დაარტყა", — ამბობს სტოუ.

სტოუს თქმით, მფლობელმა მას უთხრა, რომ სათვალე თაობიდან თაობას გადაეცემოდა მას შემდეგ, რაც მისი წინაპარი 1920-იან წლებში განდის სამხრეთ აფრიკაში შეხვდა.

"თვალი გადავავლეთ თარიღებს და ყველაფერი ემთხვევა. მათ შორის ის თარიღიც, როცა განდიმ სათვალის ტარება დაიწყო", — ამბობს იგი.

"ალბათ ერთ-ერთი პირველი სათვალე იყო, რომელიც მას ჰქონდა, რადგან პატარა ნომერი აქვს.

"განდი იმითაც იყო ცნობილი, რომ თავის საკუთარ ნივთებს ხშირად ჩუქნიდა ადამიანებს".

მაჰათმა განდი ერთ-ერთ საპროტესტო აქციაზე.

ფოტო: Central Press/Getty Images

სტოუ ამბობს, რომ სათვალით დაინტერესება დიდია, განსაკუთრებით ინდოეთიდან, ამიტომ ძალიან გაუმართლათ, რომ ნივთი ხელუხლებლად აღმოჩნდა მათ ხელში.

"უბრალოდ, მოკრძალებულ თეთრ კონვერტში იყო მოთავსებული. თავისუფლად შეიძლებოდა, ვინმეს მოეპარა, ყუთიდან გადმოვარდნილიყო ან სანაგვეზე აღმოჩენილიყო.

"ალბათ ჩვენი კომპანიისთვის ეს ყველაზე მნიშვნელოვანი მონაპოვარია", — აღნიშნავს იგი.

განდის სათვალე ონლაინ-აუქციონზე გასაყიდად 21 აგვისტოს გამოჩნდება.