როგორც ჩანს, Hulu-ს მიაჩნია, რომ სულაც არ არის აუცილებელი, ყველა სერიალი დაუსრულებლად გრძელდებოდეს და თავისი ამ წლის გახმაურებული კომედიური დრამა High Fidelity ერთი სეზონის შემდეგ გააუქმა.

სერიალი თავდაპირველად Disney Plus-სთვის შეიქმნა, თუმცა მასში წამოჭრილი სიუჟეტური დეტალების გამო დისნეიმ ის თავისი პლატფორმისთვის შეუფერებლად მიიჩნია (რადგან ის ძირითადად საბავშვო და ოჯახური გაწყობის მქონე შინაარსობრივ მასალაზეა ორიენტირებული) და მისი პრემიერა ამ წლის თებერვალში Hulu-ზე შედგა.

შოუმ მალევე როგორც მაყურებლებისგან, ისე კრიტიკოსებისგან დადებითი შეფასებები დაიმსახურა და ყველა მოუთმენლად ელოდა, თუ რა ბედი ეწეოდა ამ პროექტს. როგორც Variety წერს, გაგრძელების მოლოდინი ჰქონდა მთავარი როლის შემსრულებელ მსახიობ ზოი კრავიცსაც:

"ვფიქრობ, ამ სერიალს დიდი პოტენციალი აქვს: ბევრი შესაძლებლობაა, რომ პერსონაჟების განვითარება და კიდევ არაერთ პრობლემასთან მათ მიერ გამკლავება ვიხილოთ. უამრავი კუთხით შეგვიძლია ამის გაკეთება და დიდი სიამოვნებით მივიღებდი ამაში ისევ მონაწილეობას", — განაცხადა კრავიცმა ივნისში მიცემულ ინტერვიუში.

თუმცა, სამწუხაროდ, მისი მოლოდინები არ გამართლდა.

ლიზა ბონე ფილმში High Fidelity.

ფოტო: Buena Vista Pictures

High Fidelity-ის ძირითადი სიუჟეტური ხაზი მთავარი გმირის, ვინილების მაღაზიის მფლობელი რობის ირგვლივ ვითარდება, რომელიც პოპ კულტურის დიდი ფანია. სერიალი ინგლისელი მწერლის ნიკ ჰორნბის 1995 წელს გამოქვეყნებულ ამავე სახელწოდების ცნობილ რომანს ეფუძნება, რომლის მიხედვითაც 2000 წელს სრულმეტრაჟიანი ფილმიც გადაიღეს, სადაც მთავარ როლს ჯონ კიუსაკი ასრულებს.

აღსანიშნავია, რომ High Fidelity-ის კინოეკრანიზაციაში თამაშობს ზოი კრავიცის დედაც: ლიზა ბონე მთავარი გმირის, რობის ყოფილი შეყვარებულის როლს ასრულებს.