ბრიტანეთის ჩრდილოეთით, ტბა ლოხ-ლემონდის ნაპირებზე გატარებული საოჯახო არდადეგების დროს გაუჩინარებული კატა თორმეტი წლის შემდეგ იპოვეს.

სამფერა ჯორჯიმ თავის მეპატრონეებთან ერთად შოტლანდიის პატარა ქალაქ როვარდენანში 2008 წლის ოქტომბრის ნახევარი კარავში მცხოვრებმა გაატარა, თუმცა უკან დაბრუნებამდე ცოტა ხნით ადრე გაუჩინარდა.

უშედეგო ძიების შემდეგ დევისების ოჯახი ჯორჯის გარეშე დაბრუნდა მშობლიურ მანჩესტერში იმის იმედით, რომ მათ საყვარელ კატას ვინმე იპოვიდა და მიკროჩიპის საშუალებით პატრონებს დაუბრუნებდა.

ეს მართლაც ასე მოხდა, ოღონდ 12 წლის დაგვიანებით: დაკარგული კატა შოტლანდიაში დაკარგვის ადგილიდან ახლოს მდებარე დედოფალი ელიზაბეტის სახელობის პარკში დასახლდა და მას იქვე მომუშავე ადამიანები ან სხვა დამსვენებლები კვებავდნენ.

კორონავირუსის პანდემიის გამო გამკაცრებული უსაფრთხოების ზომების მიღების შემდეგ კი ერთ-ერთმა ადგილობრივმა თანამშრომელმა ჯორჯი დაიჭირა და ცხოველთა საქველმოქმედო ორგანიზაციას მიაბარა, სადაც ჩიპის დახმარებით აღმოაჩინეს, რომ მისი პატრონები მანჩესტერის ქალაქ როჩდეილიდან არიან.

"გულდაწყვეტილები ვიყავით, როცა ჯორჯი ლოხ-ლემონდიდან წამოსვლისას ვერ ვიპოვეთ. ახლა კი მოულოდნელი სიურპრიზია, როცა ვიცით, რომ თავს კარგად გრძნობს და ამ დროის განმავლობაში მასზე ზრუნავდნენ კიდეც", — განაცხადა კატის მეპატრონემ, ემი დევისმა.

დაუჯერებელი სიხარულის მიუხედავად, დევისების ოჯახში ჯორჯი მაინც ვერ დაბრუნდება: მის ძველ პატრონებს ახალი კატა ჰყავთ, ის კი სხვა ცხოველებს ცუდად ეგუება.

"როცა დავინახე, მინდოდა ჯორჯი მანქანაში ჩამესვა და მაშინვე სახლში წამომეყვანა, თუმცა ჩვენ ამჟამად სხვა კატა გვყავს, რომელსაც 9 წელია ვუვლით. როცა ცხოველთა თავშესაფარში მის ამჟამინდელ მომვლელებს ვესაუბრე, გავიგე, რომ ჩვენი სახლის გარემო ჯორჯისთვის შესაფერი არ იქნებოდა, რადგან მას მეტი თავისუფალი სივრცე და დამოუკიდებლობა სჭირდება. ძალიან სევდიანია, რომ ამდენი ხნის შემდეგ ერთად ყოფნას კვლავ ვერ შევძლებთ, თუმცა მაინც ისე გავაკეთებ ყველაფერს, რაც ჯორჯისთვის იქნება საუკეთესო", — განაცხადა დევისმა.

ცხოველთა თავშესაფრის წარმომადგენლის განცხადებით, ამჟამად ჯორჯისთვის ახალ მეპატრონეს ეძებენ, რომელიც ამ გამორჩეულ ოთხფეხა მეგობარს ეზოში სეირნობის უფლებას მისცემს და სახლშიც ერთადერთი ყურადღების ობიექტი იქნება.

"ის საოცრად საყვარელია და ადამიანებთან ურთიერთობაც მოსწონს, ამიტომაც, შესანიშნავი კომპანიონი იქნება", — ამბობს ლინსი ანდერსონი, ცხოველთა თავშესაფრის წარმომადგენელი.