Marvel-ის შან-ჩი და ათი ბეჭდის ლეგენდა (Shang-Chi and the Legend of the Ten Rings) მზადაა წარმოების გასაახლებლად, ახალ ვიდეოში კი მისი გადასაღები მოედნის დიდი აზიური სოფელი ჩანს. ფილმი ოფიციალურად San Diego Comic-Con-ზე შარშან ზაფხულში დაანონსდა და მასში მთავარი პერსონაჟის, კუნგ-ფუს ოსტატი შან-ჩის, როლს სიმუ ლიუ შეასრულებს.

სცენარის სპეციფიკური დეტალები ჯერ კიდევ უცნობია, თუმცა ფილმის მთავარი ბოროტმოქმედი უკვე დაანონსდა: მანდარინი (The Mandarin). მართალია, კომიქსის ბოროტმოქმედი ტექნიკურად უკვე გამოჩნდა Iron Man 3-ში, თუმცა ფილმის მიწურულს ის თვითმარქვია გამოდგა; შან-ჩიში ნამდვილ მანდარინს ვიხილავთ და მის როლს ტონი ჩუ-ვაი ლიუნი შეასრულებს. გარდა ამისა, მსახიობთა გუნდში აკვაფინაცაა, ჯერჯერობით უცნობი როლით.

ავსტრალიურმა 7NEWS-მა შან-ჩის აგების პროცესში მყოფი გადასაღები მოედნის საჰაერო ჩანაწერი გაგვიზიარა. ვიდეოში ჩანს, როგორ აგებენ აზიურ სოფელს, და მისით აგრეთვე დასტურდება, რომ შან-ჩის მსახიობები და გადამღები გუნდი ქვეყანაში დაბრუნდა. სავარაუდოა, რომ გადაღებები რამდენიმე დღეში დაიწყება. იხილეთ ვიდეო:

შან-ჩიზე მუშაობა წელს დაიწყო ავსტრალიაში და ფანებს იმდროინდელ გადაღებებზე უკვე შეავლებინეს თვალი. მიუხედავად ამისა, კორონავირუსის პანდემიამ მალევე შეაჩერა ფილმის გადაღებები, რეჟისორმა დესტინ დენიელ კრეტონმა კი კორონავირუსის ტესტიც კი გაიკეთა. მართალია, პასუხი უარყოფითი აღმოჩნდა, მაგრამ სხვა მრავალი ფილმის მსგავსად შან-ჩის წარმოება თვეების განმავლობაში შეჩერდა. წინა თვეში ცნობილი გახდა, რომ შან-ჩიზე მუშაობის განახლება ივლისის მიწურულიდან იგეგმებოდა და, როგორც ჩანს, ეს მართლაც ასეა.

შან-ჩის გამოშვება თავდაპირველად 2021 წლის თებერვალში იგეგმებოდა, თუმცა წარმოების დაყოვნებამ ფილმის გამოსვლის თარიღი 2021 წლის მაისამდე გადაწია (ასევე გადაიწია მარველის Black Widow-ის გამოშვების თარიღმა ნოემბრამდე). ვინაიდან ფილმზე მუშაობა უკვე განახლდა, იმედია, მას მეტი გადავადება აღარ მოუწევს, თუმცა უცნობია, ზუსტად რა ეტაპზეა ფილმის წარმოება და რამდენი სამუშაო დარჩა — თუ ჯერ კიდევ ბევრია დარჩენილი, შესაძლოა, შან-ჩის პრემიერამ კიდევ უფრო გადაიწიოს.

და მაინც, პროგრესის რაღაც ნიშნები იმედისმომცემია, განსაკუთრებით თუ გავითვალისწინებთ, რომ იმის საშიშროებაც არსებობდა, Marvel-ს თავის ფილმებზე მუშაობა შემდეგ წლამდე საერთოდ ვერ დაეწყო. შან-ჩი Marvel-ის პირველი ფილმია აზიურ სუპერგმირზე. ფანები მასზე დიდ იმედებს ამყარებენ და მოუთმენლად ელიან სიახლეებს პროექტის შესახებ. გადასაღები მოედნის ეს ახალი ვიდეო განსაკუთრებით დამაინტრიგებელია, მიუხედავად იმისა, რომ მასში მსახიობები არ ჩანან — ის ფანებს იმის შესაძლებლობას აძლევს, რომ წარმოიდგინონ, როგორი იქნება შან-ჩი.