კორონავირუსის გამო ბერლინის ლეგენდარული კლუბები დახურულია, თუმცა ტექნო-ატრაქციონმა ბერგჰაინმა თავისი კარების კვლავ გაღების გზა იპოვა და მნახველებს უჩვეულო ხმოვან გამოფენაზე იწვევს.

კლუბში ერთდროულად მხოლოდ 50 ადამიანი დაიშვება ფიზიკური დისტანციის დაცვის მიზნით, თუმცა შესასვლელში ბერგჰაინის საქვეყნოდ ცნობილი შერჩევითი დაცვა არ დგას და არავის უწევს იმაზე დარდი, შეუშვებენ თუ არა კლუბში.

ბერგჰაინის შთამბეჭდავ Kessel Hall-ში შებიჯების შემდეგ სივრცეს ტექნოს ხმა როდი ავსებს. ნაცვლად ამისა, ყოფილი ელექტროსადგურის მნახველებს გარს ეხვევა რიტმული პულსირების, ქალაქის ჩუმი ხმაურის, ბუტბუტისა და შვეულმფრენის ფრთის ტრიალის იდუმალი, თითქმის სიურრეალისტური ხმოვანება.

"უსმენ, განიცდი, შეგიძლია თვალები დახუჭო ან ღია დატოვო და ხმასთან ერთად მოიარო ოთახი", — თქვა ხმოვანი ხელოვნების ინსტალაციების მაორგანიზებელი პლატფორმა Singuhr-ის პროექტების თანაკურატორმა კარსტენ სეიფარტმა.

შოუ, რომელსაც "თერთმეტი სიმღერა — ბერგჰაინის დარბაზი" ეწოდება, სემ აუინგერისა და ჰანეს შტრობლის არტისტული დუეტის იდეით შეიქმნა და 2 აგვისტომდე გაგრძელდება.

კურატორმა მარკუს შტეფენსმა თქვა, რომ წყვილი ისეთი აკუსტიკური გამოცდილების მოსაფიქრებლად მოიწვიეს, რომელიც იქნებოდა "სივრცისთვის და სივრცეში" — ბეტონის, მაღალჭერიანი ყოფილი სამანქანო დარბაზი. ეს უკანასკნელი კლუბის მთავარი ოთახების უკან მდებარეობს და საყვარელი სივრცეა ტექნოს მოყვარულებისთვის მთელი მსოფლიოდან.

"მათთვის თვითონ ოთახიც ერთგვარი ინსტრუმენტია", — თქვა შტეფენსმა, სადაც ხმა არქიტექტურასთან ურთიერთქმედებს და სხვადასხვა ტიპის სმენით გამოცდილებას ქმნის.

რიგები და პირბადეები

ეს პროექტი ჯერ კიდევ შარშან ჩაიფიქრეს, გაცილებით ადრე, სანამ გერმანია COVID-19-ის პანდემიის გავრცელების თავიდან აცილების მიზნით კარანტინში მოექცეოდა.

მართალია, ბოლო თვეებში მრავალი შეზღუდვა მოიხსნა და მაღაზიებს, რესტორნებსა და მუზეუმებს კვლავ გახსნის საშუალება მიეცა, მაგრამ ღამის კლუბები ჯერ ისევ დახურულია, რადგან დახურულ სივრცეში ხალხის დიდი მასის თავყრილობამ შეიძლება ინფექციის გავრცელებას ხელი შეუწყოს.

ბერგჰაინის ხმოვანი გამოფენის ორგანიზატორების თქმით, თავიდან ეშინოდათ, რომ ხალხი არ მოვიდოდა.

"რეალურად, არ ვიცოდით, რა მოხდებოდა. იქნებ არც არავინ მოსულიყო დაინფიცირების შიშით?" — თქვა სეიფარტმა.

თუმცა, სადარდებელი არაფერი იყო. პირბადიანი ვიზიტორები უკვე დგანან გამოფენის რიგში.

გამოფენაზე ერთდროულად მაქსიმუმ 50 ადამიანის ყოფნის შეზღუდვა მნახველებს ვრცელ დარბაზში კომფორტულად განაწილების საშუალებას აძლევს, დიდი ღია ფანჯრები კი სუფთა ჰაერით ამარაგებს სივრცეს.

"ამასთანავე, კვირების განმავლობაში იზოლაციის შემდეგ ხალხი მზადაა, სახლიდან გავიდეს და რამე სხვაც აკეთოს. აქ შეგიძლია, სხვა ადამიანებთან ერთად იყო. ეს [გამოფენა] აგრეთვე ოთახთან გამოცდილების ქონა და იმ ემოციების შეგრძნებაა, რომლებიც მარტოოდენ მოსმენის საზღვრებს ბევრად სცდება", — თქვა სეიფარტმა.