კაცობრიობის ისტორიის კიდევ ერთი რთული პერიოდის — მეორე მსოფლიო ომის — დროს ქალები, რომლებიც ფაბრიკა-ქარხნებში მუშაობდნენ, ოფლისა და თმის სახიდან მოსაშორებლად თავზე ბენდენებს იკრავდნენ. პოპ-კულტურაში ამ ქალების წარმომადგენელი "მემოქლონე როუზის" (Rosie the Riveter) პოსტერი იყო, რომელშიც ომისდროინდელ მუშა ქალს თეთრკოპლებიანი წითელი ბენდენა ეკეთა. დღეს ერთ-ერთმა ასეთმა როუზიმ COVID-19-თან ბრძოლის საჩვენებლად სახეზე პირბადეც მოირგო.

94 წლის მეი კრაიერი მრავალი წლის განმავლობაში თეთრკოპლებიან ბენდენებს კერავდა და მათ იმ ქალებს აძლევდა, რომლებიც მას მხარს უჭერდნენ იმაში, რომ კონგრესს ომის საბრძოლო მოქმედებებში ქალების წვლილი ოფიციალურად ეღიარებინა. როდესაც აშშ-ში პანდემია დაიწყო, მეიმ თავისი უნარ-ჩვევები ოჯახისა და მეგობრებისთვის პირბადეების შექმნაშიც გამოიყენა. CNN-ის ცნობით, ვიღაცამ Facebook-ზე დაპოსტა მისი საქმიანობის შესახებ, რის შემდეგაც მეის პირბადეები ძალიან მოთხოვნადი გახდა. მან 300 პირბადე უკვე დაამზადა, თუმცა მომლოდინეთა რიგში კიდევ 1 000 ადამიანზე მეტია.

"ხალხი [პირბადეებისთვის] საჭირო ქსოვილსა და სხვა მასალებს მიგზავნის მთელი ქვეყნიდან. სრულიად წარმოუდგენელია, გაოგნებული ვარ", — ამბობს მეი კრაიერი.

თვითონ კრაიერმა მეორე მსოფლიო ომი Boeing-ის ქარხანაში გაატარა, სადაც ის საომარ თვითმფრინავებს აგებდა. ბოლო რამდენიმე წლის განმავლობაში ის აშშ-ის სენატს სთხოვდა, "მემოქლონე როუზი" — როგორც ყველა ნამდვილი როუზის სიმბოლო — კონგრესის ოქროს მედლით დაესაჩუქრებინა, რომელიც ამერიკის ისტორიის ეროვნულ მუზეუმში გამოიფინებოდა. 2019 წელს სარჩეილი ოფიციალურად წარედგინა სენატს, თუმცა ჯერჯერობით მას დასამტკიცებლად საკმარისი ხმა არ აქვს.

თუმცა, ეს შეიძლება შეიცვალოს. კრაიერის პირბადეების კეთების ინიციატივად მედიაში დიდი ყურადღება დაიმსახურა. მეი თეთრკოპლებიან ნიღბებს იმისთვის იყენებს, რომ ხალხს შეახსენოს, თუ როგორ მოახერხა ამერიკის შეერთებულმა შტატებმა კიდევ ერთი მძიმე პერიოდის გავლა იმ ქალების მეშვეობით, რომლებიც საჭიროების ჟამს საქმეში ჩაერთნენ.