ქალაქ ოზურგეთის მერია შემოქმედის ეპარქიას 2017 წლის ბიუჯეტიდან თანხას არ გამოუყოფს. როგორც ოზურგეთის მერმა ბეგლარ სიორიძემ აიპრესთან ინტერვიუს დროს განაცხადა, გადაწყვეტილების მიზეზი თანხების არამიზნობრივი ხარჯვა გახდა.

სიორიძეს თქმით, მერიამ კანონმდებლობით გათვალისწინებული შემოწმება ჩაატარა, რის შედეგადაც გაირკვა, რომ შემოქმედის ეპარქია 2016 წლის ბიუჯეტიდან გადარიცხული თანხა არამიზნობრივად დახარჯა:

"იმ ხელშეკრულების მიხედვით, რაც ჩვენს შორის იყო გაფორმებული ეს თანხა უნდა მოხმარებოდა ქალაქის ტერიტორიაზე არსებულ ეკლესია-მონასტრებს, აღმოჩნდა, რომ თანხა იხარჯებოდა სხვა მიმართულებით. ამიტომ, გადავწყვიტეთ და 2017 წლის ბიუჯეტიდან ამოვიღეთ ეპარქიის დაფინანსება".

ბეგლარ სიორიძის თქმით, მერა პატივს სცემს მართლმადიდებელ ეკლესიას, პატრიარქს და სინოდს, მაგრამ არ შეეგუებიან არცერთი პირის მიერ, რაიმე სახის კანონდარღვევას.

როგორც შემოქმედის ეპარქიის მიტროპოლიტი იოსები ტაბულასთან საუბარში აცხადებს, ბეგლარ სიორიძის ბრალდება უსაფუძვლოა და ის ხვალ აპირებს გამოაქვეყნოს, თუ რაში დაიხარჯა ეპარქიისთვის გამოყოფილი 25 000 ლარი.