ჯანდაცვის მინისტრის მოადგილე, თამარ გაბუნია აცხადებს, რომ Biozek-ის სწრაფ ტესტებს, რომელიც არა ნიდერლანდური, არამედ ჩინური აღმოჩნდა, აღარ შეისყიდიან. იგი ამას იმით განმარტავს, რომ იმპორტიორმა კომპანიამ მიწოდებისთვის ნაკისრი ვადა ვერ დაიცვა.

"ჩვენ ტესტის შესრულებაში ეჭვის შეტანის საფუძველი არ გვქონია, თუმცა ხელშეკრულებით განსაზღვრულ ვადაში ტესტები ვერ მოგვაწოდეს და ამის გამო ჯანდაცვის სამინისტრომ მიიღო გადაწყვეტილება შეეჩერებინა ხელშეკრულება. დღეს Biozek-ის ტესტების შესყიდვის ხელშეკრულება არ გვაქვს და არც მომავალში შევისყიდით".

მინისტრის მოადგილის თქმით, Biozek-ის 5000 ტესტი მანამდე საჩუქრად მიიღეს, რაც გამოიყენეს კიდეც ცხელების ცენტრებში, კოვიდის კლინიკებში, სამედიცინო პერსონალის ტესტირებისას:

"გარკვეული შედეგები საწყისი გამოყენების საფუძველზე მივიღეთ და მცირე ჯგუფში, კოვიდ დადასტურებული პაციენტების ჯგუფში შეაფასეს პაციენტის მდგომარეობა სწრაფი და PCR ტესტით. სწრაფმა ტესტმა აჩვენა დადებითი შედეგები, რაც ახლოს იყო წინასწარ მონაცემებთანაც. თამარ გაბუნია განმარტავს, რომ ტესტების ვალიდაციას ქვეყანა არც შესყიდვამდე და არც მის მერე არ აკეთებს.

On.ge-ს კითხვაზე, აპირებენ თუ არა ანტისხეულის სხვა სწრაფი ტესტის შეძენას? და თუკი დღესდღეობით არ აქვს საქართველოს ასეთი ტესტები, რითი ანაცვლებენ? — მინისტრის მოადგილე ზოგადად პასუხობს, რომ ტესტის შეძენისას სამინისტრო რეგისტრაციის ქვეყანას, წარმოებასა და მის ისტორიას აქცევს ყურადღებას:

"წინასწარ შეუძლებელია ყველა შესასყიდი ტესტის ვალიდაცია გავაკეთოთ. გარკვეული რისკები ყოველთვის არის და ისედაც ანტისხეულების ტესტების მგრძნობელობა არ არის 100 პროცენტი".

თამარ გაბუნია განმარტავს, რომ Biozek-ის სწრაფი ტესტები რეგულირების სააგენტომ დაარეგისტრირა აპრილის დასაწყისში. მისივე თქმით, ტესტი აკმაყოფილებდა ყველა მოთხოვნას:

"იგი რეგისტრირებული იყო ნიდერლანდებში. მას ახლდა არაერთი სერთიფიკატი ხარისხის შესახებ. შემდეგ, ჯანდაცვის სამინისტრო აქტიურად ეძებდა ანტისხეულების ტესტებს, რადგან გარკვეული დამხმარე მნიშვნელონა, მათ დიაგნოსტიკაში აქვს. სამინისტროსთან შექმნილია საკონსულტაციო ჯგუფში, სადაც იღებენ გადაწყვეტილებას, რა ტიპის ტესტი უნდა შეისყიდონ და ვისგან. ლაბორატირიული სამუშაო ჯგუფის მიერ, კონკრეტულად ბიოზეკის ტესტების შესყიდვის საკითხი განიხილეს 24 აპრილს, იმის საფუძველზე რა დოკუმენტაციაც ახლდა, დადებითი გადაწყვეტილება მიიღო კომისიამ".

ტესტების გარშემო ახალი კითხვები მას შემდეგ გაჩნდა, რაც აღმოჩნდა, რომ საქართველოს მთავრობის მიერ შეძენილი "ნიდერლანდებში დამზადებული" 30 000 სწრაფი ტესტი ჩინეთშია წარმოებული.

OCCRP-სა და ნიდერლანდური პლატფორმა Investico-ს ჟურნალისტური გამოძიების მიხედვით, კომპანია Inzek International Trading ყიდდა ანტისხეულების სწრაფ ტესტს სახელმწოდებით Biozek, რომელზეც "ნიდერლანდებში დამზადებული ეწერა და სინამდვილეში, ჩინეთშია წარმოებული.

ამ გამოძიებასა და იმაზე, რომ ამავე კომპაანისგან საქართველომ ათეულობით ათასი ტესტი შეისყიდა, გამოცემა OC Media წერს. მათი ცნობით, საქართველოს მთავრობის მიერ შეძენილია 930 000 ლარის ($290 000) ღირებულების "ნიდერლანდური წარმოების" ანტისხეულების 30 ათასი ტესტი.

ამავე გამოცემის ინფორმაციით, მანამდე, 15 აპრილს Biozek-ის 5 000 ტესტი საქართველოს მთავრობას თიბისი ბანკმა აჩუქა. შემდეგ კი ჯანდაცვის სამინისტრომ ტესტები პირდაპირი შესყიდვის წესით, სამედიცინო იმპორტიორ სოლმარტისგან შეიძინა. დოკუმენტი 24 აპრილით თარიღდება.