აშშ საქართველოს 2 000 მაღალი ხარისხის სწრაფი ტესტების კომპლექტს გამოუგზავნის, რომელსაც რამდენიმე საათში შეუძლია ვირუსის დადგენა. ამის შესახებ აშშ-ს ელჩმა, კელი დეგნანმა ვიდეომიმართვაში განაცხადა:

"აშშ-ს დაავადებათა კონტროლის ცენტრები, თავდაცვის საფრთხის შემცირების სააგენტო და უოლტერ რიდის სახელობის კვლევითი ინსტიტუტი ახორციელებს მნიშვნელოვან სამუშაოს საქართველოს ჯანდაცვის ხელმძღვანელ პირებთან პარნიორობით. მათი პარტნიორობა ხელს უწყობს ვირუსის სადიაგნოსტიკო ტესტირების შესაძლებლობის განვითარებას ლუგარის ცენტრში".

საქართველოს ჯანდაცვის სამინისტრომ და ექსპერტებმა ტესტირების ალგორითმი შეიმუშავეს, რომელიც 4 ჯგუფის ტესტირებას ითვალისწინებს. ტესტირება ჩაუტარდებათ: მაღალი რისკის ჯგუფში შემავალ პირებს სპეციფიური სიმპტომებით, უსიმპტომო პირებს მაღალი რისკის ჯგუფებიდან სტრატეგიულ ობიექტებში (მედპერსონალი), ჰოსპიტალიზებულ და ამბულატორიულ პაციენტებს და ორგანიზებულ ჯგუფებს.

სწორედ ორგანიზებულ ჯგუფებში პროტოკოლში გაწერილი არიან:

  • საეკლესიო პირები, მონასტრები და სხვა;
  • პენიტენციურ დაწესებულებებში მყოფი პირები;
  • ხანდაზმულთა სადღეღამისო სპეციალიზებული დაწესებულებებში მყოფები;
    თავდაცვის ძალები;
  • სტაციონარული ფსიქიატრიული დაწესებულებებში მყოფები.

პროტოკოლის მიხედვით, ამ ჯგუფში მყოფ უსიმპტომო პირებს უტარდებათ სკრინინგი ანტისხეულებზე სწრაფი ტესტით, პარალელურად შესაძლებელია ანტიგენის სწრაფი ტესტის ჩატარებაც. თუ ორგანიზებულ ჯგუფებთან მყოფ პირებს დაუდგინდება ინფექცია, ისინი განიხილებიან, როგორც სავარაუდო კონტაქტები და მიეცემათ თვითიზოლაციის ინსტრუქტაჟი. თუ ტესტის შედეგი ანტისხეულებზე დადებითია, იღებენ დამატებით ცხვირ-ხახის ნაცხს ანტიგენისა და PCR კვლევისთვის. უარყოფითი პასუხისას კი განმეორებითი ტესტირება სიმპტომების გაჩენის შემთხვევაში ტარდება.

ჯანდაცვის სფერო და სამთავრობო გუნდის წარმომადგენლები ამბობენ, რომ ვირუსის პიკს სწორედ აპრილის ბოლოს და მაისის დასაწყისში ველოდებით, რაც რელიგიურ დღესასწაულებს ემთხვევა.

ბოლო მონაცემებით, საქართველოში კორონავირუსის 218 დადასტურებული შემთხვევაა, მათგან 50 გამოჯანმრთელებულია, 3 კი გარდაცვლილი. კარანტინის რეჟიმში 4 722 ადამიანია, სტაციონარში მეთვალყურეობის ქვეშ - 408.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: