დაავადებათა კონტროლის ეროვნული ცენტრის ხელმძღვანელი ამირან გამყრელიძე ამბობს, რომ ინფექციამ არ იცის ვინ ვისი შვილია და ის ყველას თანაბრად ეხება. ეს კომენტარი მან შვილის, ნიკოლოზ გამყრელიძის კორონავიურსით ინფიცირებასთან დაკავშირებით გააკეთა.

"არაფერი დასამალი არაა, ჩემმა შვილმა თვითონ გაავრცელა ეს ინფორმაცია, ეს მისი სამოქალაქო პასუხისმგებლობა და უფლებაა. ინფექციამ არ იცის ვინ ვისი შვილია, ყველას თანაბრად ეხება. ჩემი შვილი არის კონტაქტირებული იმ კალსტერთან, რომელიც იტალიიდან დაბრუნდა. ისინი არიან თანამშრომლები და დიდი ალბათობით იქიდან მოხდა გადაცემა", — თქვა ამირან გამყრელიძემ.

ამირან გამყრელიძემ აღნიშნა, რომ მისმა შვილმა დაწერა სია, ვისთანაც ამ პერიოდის განმავლობაში ჰქონდა კონტაქტი და გადასცა დაავადებათა კონტროლის ეროვნულ ცენტრს. ამ ეტაპზე კონტაქტების კვლევა მიმდინარეობს.

დღეს, 7 მარტს, ცნობილი გახდა, რომ საქართველოში კორონავირუსის მე-10 შემთხვევა ამირან გამყრელიძის შვილს, ნიკოლოზ გამყრელიძეს დაუდასტურდა. მან ინფორმაციის გავრცელების უფლება ინფექციური საავადმყოფოს თავად მისცა.

ამ ეტაპზე საქართველოში კორონავირუსით ინფიცირების 12 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს. ამასთანავე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს. დღეს, 7 მარტს კორონავირუსით ინფიცირების კიდევ 3 შემთხვევა დადასტურდა.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: