უხანელი ორი ექთანი ინგჩუნ ძენგი და იან ჟენი ღია წერილს ავრცელებს, რომელშიც კორონავირუსთან ბრძოლის ფიზიკურ და მენტალურ გამოფიტვაზე საუბრობენ. მათი წერილი სამედიცინო ჟურნალ Lancet-ში გამოქვეყნდა. ისინი ჯანდაცვის სფეროს ყველა წარმომადგენელს ჩინეთში ჩასვლასა და დახმარებას სთხოვენ, რათა კორონავირუსს ერთად ებრძოლონ.

კორონავირუსის ძირითადი კერა ჩინეთის პროვინცია ჰუბეის 11-მილიონიანი ქალაქი უხანია. მთელი ქვეყნიდან უხანში სულ მცირე 14 ათასი ექთანი ჩავიდა. ამ ეტაპისთვის ჩინეთში კორონავირუსის, Covid-19-ის გამო 2 715 ადამიანი გარდაიცვალა, ხოლო 78 ათასი დაავადდა. ჩინეთის ჯანდაცვის ეროვნული კომიტეტის ინფორმაციით, ვირუსით მედიცინის 3 200 მუშაკს დაუფიქსირდა, მათგან 22 გარდაიცვალა.

ინგჩუნ ძენგი და იან ჟენი ჰუბეიში იანვრის ბოლოს ჩავიდნენ:

"სიტუაცია იმაზე უფრო რთული და ექსტრემალურია, ვიდრე ჩვენ წარმოგვედგინა".

წერილში ისინი ყვებიან დამცავი აღჭურვილობის ნაკლებობაზე, სახის დამცავი რესპირატორიანი ნიღბებიდან დაწყებული, ხელთათმანებითა და სათვალეებით დამთავრებული.

ძენგისა და ჟენგის წერილში აღნიშნულია ყოველდღიური მუშაობის სირთულეზეც. დამცავი სათვალეებიდან რთულია რაიმეს გარჩევა, ხოლო რამდენიმე ხელთათმანის გამო რამის გახსნა და პაციენტებისთვის ინიექციის მიცემა "დიდი გამოწვევაა". რამდენიმე საათის განმავლობაში დამცავი ნიღბების ტარების გამო ბევრ ექიმსა და ექთანს სახეზე იარები დაეტყოთ. მაშინ, როცა ზოგიერთ ექიმს ხელების მუდმივი დაბანის გამო გამონაყარი გაუჩნდა.

"დამცავი ტანსაცმლის ჩაცმა-გახდისას ენერგიისა და დროის დაზოგვის მიზნით, იზოლირებულ განყოფილებაში შესვლამდე ორი საათით ადრე წყლის დალევასა და ჭამას ვერიდებით", — ყვებიან ექთნები და ამატებენ, რომ სისხლში შაქრის დაბალი შემცველობის ან ჟანგბადის ნაკლებობის გამო არაერთმა ექთანმა გონება დაკარგა.

წერილში, ასევე, საუბარია იმ ემოციურ დატვირთვაზე, რასაც მათი მუშაობა ითხოვს:

"თუმცაღა ჩვენ პროფესიონალი ექთნები ვართ, ჩვენც ადამიანებიც ვართ. როგორც ყველა, ჩვენც გვეუფლება უმწეობის, შფოთვისა და შიშის განცდები. გამოცდილი ექთნები ნახულობენ დროს, რათა დაამშვიდონ თავიანთი კოლეგები და ჩვენი შფოთვები შეამსუბუქონ. თუცა გამოცდილი ექთნებიც ტირიან. ალბათ, იმიტომ, რომ არ ვიცით რამდენი ხანი მოგვიწევს აქ ყოფნა და Covid-19-ის ინფექციისთვის ყველაზე მაღალ რისკჯგუფს წარმოვადგენთ".

ამავე თემაზე: