მსოფლიოში ყველაზე ცნობილი სტრიმინგ სერვისი, ნეტფლიქსი 2007 წლიდან ფუნქციონირებს და ამჟამად 190-მდე ქვეყნის მილიონობით მომხმარებელს სთავაზობს სატელევიზიო შოუებისა და ფილმების მრავალფეროვან არჩევანს.

მართალია, ნეტფლიქსზე წარმოდგენილი პროდუქცია კომპანიის საერთო პოლიტიკას ექვემდებარება, თუმცა, როგორც აღმოჩნდა, ხანდახან პროდუქციის განთავსებასთან დაკავშირებულ საკითხებში რომელიმე ქვეყნის მთავრობაც ერევა.

ნეტფლიქსმა სულ ცოტა ხნის წინ მის პლატფორმაზე განთავსებული იმ სერიალებისა და ფილმების სია გამოაქვეყნა, რომლებიც კონკრეტული სახელმწიფოს მოთხოვნის საფუძველზე იმ ქვეყნის მომხმარებლებისთვის აიკრძალა.

როგორც აღმოჩნდა, 2015 წლიდან 2020 წლამდე სულ ასეთი ცხრა შემთხვევა დაფიქსირდა:

  • The Bridge — 2006 წელს გადაღებული დოკუმენტური ფილმი, რომელიც სან-ფრანცისკოში ოქროს კარიბჭის სახელით ცნობილ ხიდზე თვითმკვლელობის შემთხვევების შესახებ მოგვითხრობს. ფილმის პლატფორმიდან ამოღება ახალ ზელანდიაში 2015 წელს მოითხოვეს.
  • Night of the Living Dead — 1968 წელს გადაღებული საშინელებათა ჟანრის ამ ფილმის აკრძალვა გერმანიაში 2017 წელს ახალგაზრდების დაცვის კომისიამ მოითხოვა.
  • Full Metal Jacket — სტენლი კუბრიკის 1987 წლის ფილმი ვიეტნამის ომზე 2017 წელს აიკრძალა ნეტფლიქსზე ვიეტნამში.
  • Cooking on High, The Legend of 420 და Disjointed — ამ სამი ფილმის სტრიმინგ სერვისიდან აღება სინგაპურში 2018 წელს მოითხოვეს.
  • The Last Temptation of Christ — მარტინ სკორსეზეს გახმაურებული ფილმის აღება ასევე სინგაპურში მოითხოვეს 2019 წელს.
  • სერიალ Patriot Act with Hasan Minhaj-ის ერთი ეპიზოდი Saudi Arabia — აიკრძალა საუდის არაბეთში 2019 წელს.
  • The Last Hangover — ნეტფლიქსის მიერ წარმოებული კომედია, რომელიც ბიბლიურ სიუჟეტზე მოგვითხრობს, სინგაპურში 2020 წლის დასაწყიში შეიზღუდა.