სულ ცოტა ხნის წინ საზოგადოებრივმა მაუწყებელმა დააანონსა, რომ მალე ერთ-ერთი ყველაზე გავლენიანი ამერიკული სატელევიზიო არხის, HBO-ს ცნობილი სერიალის, In Treatment-ის ქართულ ანალოგს იღებენ და მას სეანსი ერქმევა:

In Treatment-ის პრემიერა 2008 წელს შედგა და ის ფსიქოთერაპევტი პოლ უისტონის შესახებ მოგვითხრობს. უისტონს ყოველკვირეული სეანსები აქვს თავის პაციენტებთან და სწორედ ამ დროს მაყურებლები არაერთი პერსონაჟის სხვადასხვა ყოველდღიური პრობლემის სიღრმისეულ მიზეზებს კარგად ეცნობიან.

პირველი არხის მიერ გავრცელებულ ანონსში გამოკვეთილია ის თემები, რასაც ამ სერიალის ქართულ ვერსიაშიც ვიხილავთ: ოჯახური პრობლემები, დეპრესია, ბულინგი, ჰომოფობია და ა.შ. შესაბამისად, განსაკუთრებით საინტერესოა, თუ როგორ მოხდება ამ თემების რეპრეზენტაცია ქართულ შოუში.

ორიგინალი სერიალი სულ სამი სეზონის განმავლობაში გაგრძელდა და 2010 წელს დასრულდა. შოუს შემქმნელებმა მოახერხეს, რომ თითქმის ყველა გავლენიან დაჯილდოებაზე წარმატებას მიაღწიეთ: In Treatment ოქროს გლობუსისა და ემის მფლობელი სერიალია.

ჯერჯერობით უცნობია, თუ ვის ვიხილავთ ამ ცნობილი სატელევიზიო შოუს ქართულ ანალოგში, ან როდის უნდა ველოდოთ პრემიერას, თუმცა სერიალების მოყვარულებისთვის ისიც კმარა ლოდინის მიზეზად, რომ ეს თამამი პროექტი საკუთარი თვალით იხილონ და ისე შეაფასონ ქართული სატელევიზიო სივრცის მომავალი.

ქართული ტელევიზიები სხვადასხვა საერთაშორისო პროექტების, იქნება ეს გასართობი, შემეცნებითი თუ პოლიტიკური შინაარსის მქონე შოუები, ადგილობრივ ვერსიებს ხშირად ქმნიან: მაგალითად, ნიჭიერი, მასტერშეფი და ახალი ხმა. შესაბამისად, საინტერესო იქნება, თუ როგორ გაამართლებს ამჯერად მსოფლიოში ცნობილი სერილის ქართული ანალოგი.