Music to be Murdered by (მუსიკა, რომელიც მოგკლავს) — ასე ჰქვია მარშალ მეზერსის მე-11 სტუდიურ ალბომს, რომელიც მუსიკოსმა წინასწარი გაფრთხილებებისა და შემზადებების გარეშე გამოუშვა.

"ეს შენი დასაფლავებაა", — ამ აღწერით შესთავაზა ემინემმა ახალი ალბომი მსმენელს.

ალბომის ქავერის დიზაინი და დასახელება ემინემმა ალფრედ ჰიჩკოკის 1958 წლის ჩანაწერიდან აიღო.

20-ტრეკიან ალბომში ერთ-ერთი კომპოზიციას სახელად Alfred ჰქვია, რომელშიც ლეგენდარული რეჟისორის სიტყვები გვესმის:

"როგორ ხართ? ქალბატონებო და ბატონებო, მე ალფრედ ჰიჩკოკი მქვია და ესაა მუსიკა, რომელიც მოგკლავს, ესაა მელოდია, რომელიც თქვენს ყურებში ჩაიღვრება, რატომ არ მოდუნდებით? გადაწექით და ისიამოვნეთ, სანამ თქვენი მკვლელობის გამოსაძიებლად მოვლენ".

ალბომიდან პირველი მუსიკალური ვიდეო ემინემმა რამდენიმე საათის წინ გამოუშვა.

Music to be Murdered by გამოშვების დღესვე გახდა საკამათო, მასში შესული სიმღერის, Unaccommodating-ის სიტყვების გამო, რომელშიც ის არიანა გრანდეს კონცერტზე 2017 წლის ტერორისტულ აქტს იხსენებს. თვითმკვლელმა ტერორისტმა მანჩესტერში გამართულ კონცერტზე 22 ადამიანი იმსხვერპლა.