პარლამენტში რიგგარეშე სხდომაზე ნიკა მელიას ადგილმონაცვლის არჩევას განიხილავენ. ნაციონალური მოძრაობის წარმომადგენლის კენჭისყრის პროცესს თავად პარტიის წევრები არ ესწრებიან, რამაც უმრავლესობის წევრების უკმაყოფილება გამოიწვია. ისინი ნაციონალური მოძრაობის წევრებს უპასუხისმგებლობაში ადანაშაულებენ.

უმრავლესობის ლიდერი, მამუკა მდინარაძე ამბობს, რომ მელიას ადგილმონაცვლის არჩევას პროცედურული დემოკრატია მოითხოვს.

"ჩვენ მწვანე ღილაკს ვაჭერთ თითს იმიტომ, რომ ვასრულებთ ჩვენს ფორმალურ ვალდებულებას. შეიძლება ეს ყველაფერი არავის არ უხაროდეს. ნაციონალურ მოძრაობას იმდენად რცხვენია, რომ ვერ გაბედა თავის თანაგუნდელთან დაკავშირებით ეს ფორმალური უფლებამოსილება შეასრულონ. კიდევ ერთხელ დავანახებთ საზოგადოებას, რას ნიშნავს ნიშნავს და ვის შემოყვანას პარლამენტში", — განაცხადა მდინარაძემ.

დღეს, 17 იანვარს რიგგარეშე სხდომაზე პარტიული სიით მელიას ადგილმონაცვლის, ბადრი ბასიშვილის კანდიდატურა უნდა დაემტკიცებინათ, თუმცა ოპოზიცია ისევ ბოიკოტის რეჟიმში რჩება და პლენარულ სხდომებს არ ესწრება. ოცნების დეპუტატების ნაწილი აცხადებს, რომ თუ ენმ-ს საკუთარი თანაგუნდელისთვის მანდატის მინიჭება არ სურს, არც ისინი უნდა იყვნენ ვალდებულები კანდიდატს კენჭი უყარონ.

უმრავლესობის ლიდერები კრიტიკულად განწყობილ თანაგუნდელებს უხსნიან, რომ ისინი, როგორც პასუხისმგებლიანი პოლიტიკოსები, ვალდებული არიან მოვალეობა შეასრულონ და ენმ-ს არ დაემსგავსონ. საპროცედურო საკითხთა კომიტეტის თავმჯდომარე კი განმარტავს, რომ რეგლამენტის მიხედვით ვალდებულები არიან პირველ საკითხად დეპუტატის მანდატი განიხილონ და მანამდე სხვა საკითხებზე ვერ იმსჯელებენ.

ნაციონალური მოძრაობა და ზოგადად საპარლამენტო ოპოზიცია უკვე რამდენიმე თვეა რაც ბოიკოტის რეჟიმშია და პარლამენტის სხდომებს არ ესწრება მას შემდეგ, რაც პროპორციული საარჩევნო სისტემის კანონპროექტი ჩავარდა.