ქართული ოცნების დეპუტატები ნაციონალურ მოძრაობას უპასუხისმგებლობაში ადანაშაულებენ იმის გამო, რომ ისინი ნიკა მელიას ადგილმონაცვლის მანდატის კენჭისყრას არ ესწრებიან. ამის გამო, ნუკრი ქანთარიამ კოლეგებს შესთავაზა, რომ ეს განხილვა მომდევნო სხდომისთვის გადადონ, როდესაც "გაბუტულები" ანუ ენმ სხდომაზე მივა.

დღეს, 17 იანვარს რიგგარეშე სხდომაზე პარტიული სიით მელიას ადგილმონაცვლის, ბადრი ბასიშვილის კანდიდატურა უნდა დაემტკიცებინათ, თუმცა ოპოზიცია ისევ ბოიკოტის რეჟიმში რჩება და პლენარულ სხდომებს არ ესწრება. ოცნების დეპუტატების ნაწილი აცხადებს, რომ თუ ენმ-ს საკუთარი თანაგუნდელისთვის მანდატის მინიჭება არ სურს, არც ისინი უნდა იყვნენ ვალდებულები კანდიდატს კენჭი უყარონ.

უმრავლესობის ლიდერები, გია ვოლსკი და მამუკა მდინარაძე კრიტიკულად განწყობილ თანაგუნდელებს უხსნიან, რომ ისინი, როგორც პასუხისმგებლიანი პოლიტიკოსები, ვალდებული არიან მოვალეობა შეასრულონ და ენმ-ს არ დაემსგავსონ. საპროცედურო საკითხთა კომიტეტის თავმჯდომარე კი განმარტავს, რომ რეგლამენტის მიხედვით ვალდებულები არიან პირველ საკითხად დეპუტატის მანდატი განიხილონ და მანამდე სხვა საკითხებზე ვერ იმსჯელებენ.

ოცნების დეპუტატებს გაუჩნდათ იდეა, რომ "ფორმალური დემოკრატიის თავიდან ასარიდებლად" სხვა დროს მანდატის მინიჭება და ან მოხსნა ავტომატურად მოხდეს და შესაბამისი ცვლილებები რეგლამენტში აისახოს. მამუკა მდინარაძემ განაცხადა, რომ წარმოუდგენელია მსგავსი გადაწყვეტილება რომელიმე სხვა ორგანომ, მათ შორის, თუნდაც, ცესკომ მიიღოს.

ნიკა მელიას პარლამენტმა ჯერ დეპუტატის იმუნიტეტი შეუჩერა, შემდეგ კი მანდატი შეუწყვიტა. ორივე გადაწყვეტილება პარლამენტმა მელიას წინააღდეგ აღძრული სხვადასხვა სისხლის სამართლის საქმეების გამო მიიღო.

მელიასთვის დეპუტატის მანდატის შეწყვეტა 7 წლის წინ დაწყებულ გამოძიებაზე მიღებულმა სასამართლო განაჩენმა გამოიწვია. მელიას სახდელი დაეკისრა. ყოფილი დეპუტატი გადაწყვეტილებას საკონსტიტუციო სასამართლოში ასაჩივრებს.