ინგლისის ქალაქ გრეივსენდში მდებარე წმინდა სამების სახელობის დაწყებითი სკოლის ხელმძღვანელობამ გადაწყვიტა, რომ მშობლების "არასასურველი ქცევის გასაუმჯობესებლად" ახალი რეგულაციები შეიმუშავოს.

თუ მოსწავლის მშობელი სწავლის დასრულების — 15:40 საათის შემდეგ შვილის წასაყვანად სკოლაში დააგვიანებს, ყოველ 5 წუთზე 1 გირვანქა სტერლინგით დაჯარიმდება. ხოლო იმ შემთხვევაში, თუ ის 16:00 საათამდე არ გამოჩნდება, მაშინ სოციალურ სამსახურს დაუკავშირდებიან.

განათლების ეროვნულ გაერთიანებაში, რომელიც ძირითადად მასწავლებლებითაა დაკომპლექტებული და სასწავლო პროცესის გაუმჯობესებაზე მუშაობს, შიშობენ, რომ ისეთ სოციალურ ინსტიტუტში, როგორიც სკოლაა, "დასჯისა" და "მუქარის" შემცველი ჯარიმები "მშობლებთან პოზიტიურ ურთიერთობას გააფუჭებს".

სკოლაში კი აცხადებენ, რომ მშობლების დაგვიანების გამო მასწავლებლები დიდ დროს კარგავენ, რის გამოც სკოლას ზეგანაკვეთური სამუშაოს გამო დამატებითი ანაზღაურების გადახდა უწევს.

სკოლის დირექტორის, დენის გიბსის განცხადებით, ძალიან ხშირია შემთხვევა, როცა მშობლები ნახევარი საათის დაგვიანებით მოდიან შვილების წასაყვანად. ხოლო ის ბავშვები, ვისაც მშობლები გვიან აკითხავენ სახლში წასაყვანად, ხშირად "შფოთავენ და ისტრესებიან".

ფოტო: Getty

ამ გადაწყვეტილებასთან დაკავშირებით თავად მშობლებს განსხვავებული დამოკიდებულება აქვთ: ზოგიერთ მათგანს მოსწონს ახალი წამოწყება, ნაწილი კი ეწინააღმდეგება მას.

სკოლის ახალი პოლიტიკა გამონაკლის გარემოებებსაც ითვალისწინებს და ისეთი შემთხვევები, როგორებიცაა "უბედური შემთხვევა ან ჯანმრთელობის გაუარესება", ჯარიმას არ ექვემდებარება.

დაგვიანების შემთხვევაში მშობლებს სამჯერ გააფრთხილებენ, კვლავ განმეორების შემდეგ კი ერთ მოსწავლეზე ყოველი 5 წუთის გასვლის შემდეგ 1 გირვანქა სტერლინგით დააჯარიმებენ.

განათლების ეროვნულ გაერთიანების წარმომადგენელი, ჯერი გლეზიერი ეჭვქვეშ აყენებს სკოლის ამ გადაწყვეტილების კანონიერებას, რადგან ის დარწმუნებული არ არის, სკოლას საერთოდ აქვს თუ არა უფლება მშობლებისთვის მსგავსი სადამსჯელო პოლიტიკა გაატაროს.

ჯერჯერობით უცნობია, რას მოიმოქმედებს სკოლა, თუ მშობელი ჯარიმის გადახდაზე უარს იტყვის.