აიოვას სასამართლოს ამერიკელმა კაცმა თხოვნით მიმართა, რათა უფლება მისცენ, რომ მისი ყოფილი ცოლი და ადვოკატი ხმლებით ბრძოლაში გამოიწვიოს და ასე გადაწყდეს მათი მიმდინარე სასამართლო დავა.

კანზასის შტატში მცხოვრები 40 წლის დევიდ ოსტრომმა 3 იანვარს სასამართლოს განუცხადა, რომ ყოფილმა ცოლმა, ბრიჯიტ ოსტრომმა და მისმა ადვოკატმა, მეთიუ ჰადსონმა ის "ლეგალურად გაანადგურეს".

მისი თქმით, სასამართლოს აქვს იმის ძალაუფლება, რომ მოწინააღმდეგე მხარეებს მისცეს "დავის ბრძოლით გადაწყვეტის" უფლება. მან ისიც დაამატა, რომ სასამართლო გარჩევა ბრძოლის საშუალებით "შეერთებულ შტატებში მკაფიოდ არასდროს აკრძალულა ან შეზღუდულა".

დევიდ ოსტრომსა და მის ყოფილ ცოლს შორის დავა მეურვეობისა და ქონების გადასახადის გადანაწილების საკითხებზე მიმდინარეობს. ოსტრომის ვარაუდით, თუ სასამართლო მის თხოვნას დააკმაყოფილებს, ყოფილი ცოლის პოზიციას ბრძოლაში მისი ადვოკატი დაიცავს.

თავად ადვოკატი, მეთიუ ჰადსონი ამ მოთხოვნას საკამათოდ მიიჩნევს, რადგან დუელი შესაძლოა ფატალურად დასრულდეს, ამიტომაც მან მოსამართლეს მიმართა, რომ ეს მოთხოვნა არ გაითვალისწინოს.

საქმის განხილვისას მოსამართლე კრეიგ დრეისმაიერმა განაცხადა, რომ განაჩენს უახლოეს მომავალში ვერ გამოიტანს, რადგან ორივე მხარის მოთხოვნები სათანადო გადამოწმებას საჭიროებს.