მას შემდეგ, რაც ცნობილი გახდა, რომ მალე ჯ.რ.რ. ტოლკინის ფენტეზის ჟანრის საკულტო წიგნების, ბეჭდების მბრძანებლის ტრილოგიის სატელევიზიო ეკრანიზაციას ვიხილავდით, მილიონობით მაყურებელი მუდმივად ელოდება ნებისმიერ სიახლეს, რომელიც ამ პროექტის შესახებ გახდება ცნობილი.

სულ ცოტა ხნის წინ კი სერიალის მწარმოებელმა კომპანია Amazon-მა ოფიციალურად გამოაქვეყნა იმ 15 მსახიობის სია, რომლებიც სერიალში ძირითად გმირებს განასახიერებენ: რობერტ არამაიო, ჯოზეფ მოული, ოვეინ ართური, ნაზანინ ბონიადი, ტომ ბაჯი, მორფიდ კლარკი, ისმაელ კრუზ კორდოვა, ემა ჰორვატი, მარკელა კავენა, ტაირო მუჰაფიდინი, სოფია ნომვიტი, მეგან რიჩარდსი, დილან სმიტი, დენიელ უიმენი და ჩარლი ვიკერსი.

ნებისმიერი მკითხველი მარტივად შენიშნავდა, რომ სერიალის სამსახიობო გუნდი დიდად ვერ დაიკვეხნის ცნობილი სახეების სიმრავლით, რასაც ორი ახსნა შეიძლება ჰქონდეს: სერიალის შემქმნელებმა ამ გზით ბიუჯეტი დაზოგეს, რადგან მისი გადაღება ისედაც საოცრად ძვირი ჯდება. ან კიდევ სურთ, სრულიად ახალი პერსონაჟები შექმნან ისე, რომ მაყურებლებმა ისინი არავის მიამსგავსონ.

სულ ცოტა ხნის წინ გამოქვეყნებულ თხუთმეტწევრიან სამსახიობო გუნდში მაინც არიან ნაცნობი სახეები: რობერტ არამაიო და ჯოზეფ მოული, რომლებიც სატელევიზიო შოუების მაყურებლებს სერიალ Game Of Thrones-დან ემახსოვრებათ.

აღსანიშნავია, რომ გუნდის დიდ ნაწილს ბრიტანელი თეატრის მსახიობები შეადგენენ, თუმცა მათ შორის ამავდროულად არიან წარმოშობით ავსტრალიელი (ტომ ბაჯი), ირანელი (ნაზანინ ბონიადი) და სლოვაკი (ემა ჰორვატი) მსახიობებიც.

"ფართომასშტაბიანი ძიების შემდეგ სიხარულით წარმოგიდგენთ შესანიშნავი მსახიობების გუნდის იმ პირველ ნაწილს, რომელიც Amazon-ის პროექტში მიიღებს მონაწილეობას. ეს არ არის საბოლოო შემადგენლობა და ჩვენ ჯერ კიდევ ვარჩევთ რამდენიმე მნიშვნელოვან როლზე მსახიობებს", — განაცხადეს შოუს შემქმნელებმა.

მსახიობების შერჩევის დროს მასშტაბური სარეკლამო კამპანია იყო წამოწყებული მრავალ ქვეყანაში, რადგან სერიალისთვის სხვადასხვა სახასიათო გარეგნობის ადამიანებს ეძებდნენ: 1,5 მეტზე დაბალს თუ 1,95-ზე მაღალს, განსაკუთრებულად ჭორფლიანებს, წითურებსა და ა.შ. რაც სულაც არაა გასაკვირი, თუ გავითვალისწინებთ იმას, რომ ბეჭდების მბრძანებლის სამყარო მრავალფეროვნებით გამოირჩევა.

სერიალის გადაღებები თებერვალში ახალ ზელანდიაში იწყება. ამის გამო ქვეყნის ხელისუფლებამ უსაფრთხოების განსაკუთრებული ზომები მიიღო, რათა მაქსიმალურად აირიდოს თავიდან ისეთი ტერორისტული ტერაქტები, როგორსაც გასულ წელს ჰქონდა ადგილი ქვეყანაში.

აღსანიშნავია, რომ ბეჭდების მბრძანებლის სატელევიზიო ეკრანიზაციაზე ის ადამიანები მუშაობენ, რომლებმაც მანამდე მონაწილეობა მიიღეს ისეთი სერიალების შექმნაში, როგორებიცაა The Sopranos, Breaking Bad, Game of Thrones და Stranger Things.

სერიალის სცენარის შესახებ ჯერჯერობით ინფორმაცია გასაიდუმლოებულია, თუმცა გავრცელებული ცნობების თანახმად, პირველი სეზონის სიუჟეტური ხაზი ტოლკინის ტრილოგიის პირველი წიგნის, ბეჭდის საძმოს წინარე ისტორიას მოგვითხრობს.

თუ გავითვალისწინებთ იმასაც, რომ სერიალის გადაღება ჯამში დაახლოებით $1,3 მილიარდი დაჯდება და ამით ის ყველაზე ძვირად ღირებული სატელევიზიო შოუ იქნება ისტორიაში, გარანტირებულად შეგვიძლია ვთქვათ, რომ წინ დაუვიწყარი სანახაობა გველის.