5 იანვარს ლოს-ანჯელესში გამართულ ოქროს გლობუსის 77-ე დაჯილდოების ცერემონიაზე ამერიკელ მსახიობს, ხოაკინ ფენიქსს მხატვრულ ფილმში კაცის როლის საუკეთესო შესრულებისთვის ჯილდო გადასცეს, რამდენიმე დღის შემდეგ კი ვაშინგტონში გამართულ საპროტესტო აქციაზე დააპატიმრეს.

როგორც უკვე ვიცით, ჰოლივუდის ვარსკვლავი, ჯეინ ფონდა 2019 წლის ოქტომბრიდან ყოველ პარასკევს ვაშინგტონში გამართულ საპროტესტო აქციებს ხელმძღვანელობს, რომელთა ფარგლებშიც კლიმატის ცვლილების საწინააღმდეგო მექანიზმების უფრო მასშტაბურად გამოყენებას ითხოვენ.

აღსანიშნავია, რომ ამ აქციების გამო 82 წლის მსახიობი ჯეინ ფონდა არაერთხელ დააპატიმრეს აქციის გამართვის წესების დარღვევის ბრალდებით, მათ შორის ჯერჯერობით უკანასკნელად და მეხუთედ 20 დეკემბერს დააკავეს.

გასულ პარასკევს, 10 იანვარს ტრადიციულ ყოველკვირეულ საპროტესტო აქციას კი ამჯერად ხოაკინ ფენიქსიც შეუერთა, რომელიც სხვა ათეულობით დემონსტრანტთან ერთად მოგვიანებით დააკავეს. მანამდე მსახიობმა მოასწრო, რომ დემონსტრანტებისთვის სცენიდან სიტყვით მიემართა:

"ხანდახან არ ვიცით, როგორ უნდა შევიტანოთ ჩვენი წვლილი კლიმატის ცვლილებასთან ბრძოლაში, მაგრამ არის რაღაც, რაც შეგვიძლია დღესვე გავაკეთოთ — სწორად ავირჩიოთ ის, თუ რას შევჭამთ და მოვიხმართ".

ხოაკინ ფენიქსი ცხოველების ცნობილი უფლებადამცველია, რომელმაც წლევანდელ ოქროს გლობუსზე უცხოური პრესის ასოციაციას მადლობა საჯაროდ გადაუხადა, რომ ცერემონიის ფარგლებში მხოლოდ ვეგანური საკვები იყო წარმოდგენილი:

"ძალიან გაბედული გადაწყვეტილებაა, რომ ამ საღამოს მხოლოდ მცენარეული საკვების მირთმევა შეგვეძლება. ეს ძალიან მნიშვნელოვანი გზავნილია ყველასთვის", — განაცხადა მსახიობმა.