უკრაინის პრეზიდენტის, ვოლოდიმირ ზელენსკის ბრძანებით, 9 იანვარი გლოვის დღედ გამოცხადდა. ირანში ავიაკატასტროფაში დაღუპულთა პატივსაცემად ქვეყანაში ყველა გასართობი ღონისძიება გაუქმდა და სახელმწიფო დროშები დაეშვა.

გარდა ამისა, პრეზიდენტმა მოქალაქეებს ირანსა და ერაყში მგზავრობისგან თავის შეკავებისკენ მოუწოდა და უკრაინული ავიაკომპანიების დაუგეგმავი შემოწმებებიც დააანონსა.

ზელენსკიმ ვიდეომიმართვაც ჩაწერა, რომლითაც დაღუპულთა ოჯახებს მიუსამძიმრა და მათ სახელმწიფო დახმარებას დაპირდა. მანვე აღნიშნა, რომ უკრაინისთვის პრიორიტეტია ავიაკატასტროფის მიზეზების გარკვევა.

ვიდეომიმართვაში პრეზიდენტმა ხაზი გაუსვა იმ ფაქტს, რომ გამოძიებას ირანული მხარე აწარმოებს უკრაინელი ექსპერტების ჩართვით. მან მოუწოდა საერთაშორისო თანამეგობრობას და კანადას, რომლის მოქალაქეებიც ასევე დაიღუპნენ ავიაკატასტროფაში, რომ გამოძიებაში ჩაერთოს.

"ეს არ არის თემა ლაიქებისა და სოციალური ქსელებისთვის, სენსაციისა და კონსპირაციული თეორიებისთვის. ჩვენ მოთმინება, გამძლეობა და სიბრძნე გვჭირდება. ამ საშინელმა ტრაგედიამ უნდა ასწავლოს უკრაინის თითოეულ მოქალაქეს და მსოფლიოს ყველა ლიდერს, რომ ადამიანის სიცოცხლე დააფასოს და ეს მანამდე გააკეთოს სანამ ის ასე სწრაფად და მტკივნეულად შეწყდება", — ზელენსკის ვიდეომიმართვის ნაწყვეტს ადგილობრივი გამოცემა Unian ავრცელებს.

8 იანვარს ირანში უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები არიან. მათ შორის ირანის — 82, კანადის — 63, უკრაინის — 11, შვეიცარიის — 10, ავღანეთის — 4, გერმანიის — 3 და დიდი ბრიტანეთის — 3 მოქალაქე. უკრაინის 11 მოქალაქეს შორის 2 მგზავრი იყო, 9 კი ეკიპაჟის წევრი.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.

ირანი უარს ამბობს შავი ყუთი უკრაინას გადასცეს, თუმცა დათანხმდა იმას, რომ გამოძიებაში უკრაინელმა ექსპერტებიც ჩაერთონ.