დისნეის ანიმაცია Frozen 2-ის საერთო შემოსავლებმა $1.33 მილიარდს გადააჭარბა და ამ მაჩვენებლით ყველაზე მაღალშემოსავლიანი ანიმაციის წოდება მოიპოვა.

ამ ცნობილი ანიმაციის პირველი ნაწილი 2013 წელს გამოვიდა და კინოგაქირავებაში ისიც არანაკლებ წარმატებული აღმოჩნდა: მისმა შემოსავლებმა $1.28 მილიარდი შეადგინა. თუმცა ანიმაციის მეორე ნაწილმა თავის წინა რეკორდს და დისნეის კიდევ ერთ ანიმაციურ ფილმს, The Incredible 2-ს, რომლის შემოსავლებიც $1.24 მილიარდია, აჯობა და ისტორიაში პირველი ანიმაციური ფილმი გახდა, რომელმაც ამ შედეგს მიაღწია.

აღსანიშნავია, რომ Frozen 2-ის წინ უსწრებს 2019 წელს გამოსული დისნეის კიდევ ერთი პროდუქტი The Lion King $1.65-მილიარდიანი შემოსავლებით, თუმცა, როგორც კომპანიაში აცხადებენ, ეს უკანასკნელი ცოცხალი ელემენტებითაა გაჯერებული, კინოს ტექნიკითაა გადაღებული და ანიმაციის ტრადიციული სახე არ აქვს, ამიტომაც ის Frozen-ს პირველობაში არ ეცილება.

ფოტო: Disney

მნიშვნელოვანია ისიც, რომ გასული წელი დისნეისთვის საოცრად მომგებიანი აღმოჩნდა: კომპანიის საერთო შემოსავლებმა $10 მილიარდს გადააჭარბა და რეკორდიც მოხსნა.

2019 წლის 10 ყველაზე შემოსავლიან ფილმს შორის ექვსი ფილმი სწორედ დისნეის ეკუთვნის: Avengers: Endgame ($2.79 მილიარდი), The Lion King ($1.6 მილიარდი), Captain Marvel ($1.2 მილიარდი), Toy Story 4 ($1.07 მილიარდი), Aladdin ($1.05 მილიარდი) და Frozen 2 ($920 მილიონი). მათ შორის Avengers: Endgame ისტორიაში ყველაზე მაღალშემოსავლიანი ფილმი გახდა და ამით ისეთი კინოსურათების შედეგები გააუმჯობესა, როგორებიცაა ავატარი და ტიტანიკი.