ირანში ჩამოვარდნილ უკრაინულ თვითმფრინავზე უკრაინის მხოლოდ 11 მოქალაქე იმყოფებოდა. უკრაინის ეროვნული უსაფრთხოების საბჭოს განცხადებით, მათგან 2 მგზავრი იყო, 9 კი ეკიპაჟის წევრი.

უკრაინის ავიახაზების წარმომადგენლის განცხადებით, დანარჩენი მგზავრები კანადის, ირანის, გერმანიის, შვეიცარიისა და ავღანეთის მოქალაქეები იყვნენ. მისივე თქმით, ინფორმაცია ამ წუთებშიც ზუსტდება და დაახლოებით ნახევარ საათში გაავრცელებენ გარდაცვლილთა სიას.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიას სთხოვა მედიასა და საზოგადოებას, რომ მხოლოდ ოფიციალური ინფორმაცია გაავრცელონ, რადგან ფეისბუქსა და ტვიტერზე დეზინფორმაცია ვრცელდება, რაც გარდაცვლილთა ოჯახებს აზარალებს.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე.

უკრაინის საერთაშორისო ავიახაზების თვითმფრინავის კატასტროფის შედეგად ბორტზე მყოფი ყველა მგზავრი და ეკიპაჟის წევრი დაიღუპა. უკრაინის ეროვნული უსაფრთხოების საბჭო აცხადებს, რომ ბორტზე 177 ადამიანი იმყოფებოდა, მათგან 168 მგზავრი და 9 ეკიპაჟის წევრი იყო. საქართველოს საგარეო საქმეთა სამინისტროს ინფორმაციით, თვითმფრინავში საქართველოს მოქალაქეები არ იყვნენ.

როგორც Reuters წერს, შემთხვევა, სავარაუდოდ, ბოინგის ტექნიკურ პრობლემას უკავშირდება. იმავე ინფორმაციას ავრცელებს უკრაინის საელჩო. მათი თქმით, ამჟამად ტერორისტულ აქტს გამორიცხავენ და ჩამოვარდნის მიზეზად ტექნიკურ გაუმართაობას განიხილავენ.