ირანში ჩამოვარდნილ უკრაინის ავიახაზების თვითმფრინავში საქართველოს მოქალაქეები არ იყვნენ. ამის შესახებ ინფორმაცია On.ge-ს საგარეო საქმეთა სამინისტროში დაუდასტურეს.

8 იანვარს, გამთენიისას უკრაინის საერთაშორისო ავიახაზების თვითმფრინავის, ბოინგ 737-ის კატასტროფის შედეგად ბორტზე მყოფი 170-ვე მგზავრი დაიღუპა. ირანის სასწრაფო დახმარების სერვისების ხელმძღვანელმა ფირჰოსეინ კულივანდმა აღნიშნა, რომ ცეცხლი იმდენად ძლიერი იყო, რომ ვერც ერთი მგზავრის გადარჩენა ვერ მოხერხდა.

როგორც Reuters წერს, შემთხვევა, სავარაუდოდ, ბოინგის ტექნიკურ პრობლემას უკავშირდება. თვითმფრინავი, რომელიც კიევისკენ მიფრინავდა, თეირანის აეროპორტიდან აფრენიდან მალევა ჩამოვარდა.

უკრაინული ავიახაზების ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე.