"ჩვენ ვიქნებით სარკე, რომელშიც გამოჩნდება ყველაფერი, რაც ყარს ამ ქვეყანაში", - ამ განცხადებას გირჩი რამდენიმე წუთის წინ გავრცელებულ წერილში აკეთებს და განმარტავს, თუ რატომ შეიქმნა, რა შეცდომები დაუშვა უკანასკნელი თვეების განმავლობაში და რას აპირებს სამომავლოდ.

პარტია ამბობს, რომ ის პირველ სრულად ელექტრონულ კომუნიკაციაზე დაფუძნებულ პოლიტიკურ ორგანიზაციად გადაიქცევა, რომელსაც თავის მხარდამჭერებთან კომუნიკაცია Facebook-ის მეშვეობით ექნებათ:

"არასოდეს ვიქნებით Offline და ყველაფერი, რასაც გავაკეთებთ იქნება Public. ჩვენ ვაპირებთ დაგანახოთ თქვენ, ამ ქვეყნის მოქალაქეებს, როგორ ანადგურებთ საკუთარი შვილების მომავალს იმით, რომ მხარს უჭერთ თავისუფლების შეზღუდვას ამა თუ იმ მიმართულებით. ჩვენ ვაპირებთ, დაგანახოთ რამდენად პირდაპირ კავშირშია თქვენი სიღარიბეში ცხოვრება ქვეყანაში თავისუფლების ნაკლებობასთან. ჩვენ გავაგრძელებთ თავისუფლებისთვის ბრძოლას და ამ ბრძოლაში ვიქნებით გაცილებით რადიკალურები, გაცილებით თავისუფლები, გაცილებით რთულად ასატანები ბევრი თქვენგანისთვის. ჩვენ ვიქნებით სარკე, რომელშიც გამოჩნდება ყველაფერი, რაც ყარს ამ ქვეყანაში".

გირჩი ამბობს, რომ მისი მთავარი ტაქტიკური შეცდომა პარტიის რამდენიმე წარმომადგენლის პარლამენტში გაყვანის აუცილებლობის შესახებ მოსაზრება, საპარლამენტო ტრიბუნის, როგორც ინსტრუმენტის შენარჩუნებისთვის გადაჭარბებული მნიშვნელობის მინიჭება იყო. ამასთან გირჩი განმარტავს, რომ მისი მიერ ტრადიციული პოლიტიკური თამაშის წამოწყება ასევე შეცდომა იყო, რამაც შედეგად სხვა პარტიებთან გაერთიანება მოუტანა:

"მთავარი შინაარსობრივი შეცდომა იყო ძირითადი პრობლემის ვერ დანახვა - ჩვენი მთავარი კონკურენტი იყო არა პოლიტიკური სპექტრი, არამედ საზოგადოების ერთი ნახევრის მითოლოგიური წარმოდგენების ნაკრები და მეორე ნახევრის პოლიტიკური ცხოვრებისადმი ობიექტური ნიჰილიზმი, რაშიც ჩვენ შეცდომებსაც მიუძღვის გარკვეული წვლილი. რიგით მოქალაქეებს, ამომრჩეველთა უდიდეს ნაწილს არასოდეს უფიქრია, რა არის აუცილებელი ქვეყნის განვითარებისა და ადამიანის ბედნიერებისთვის".