თუ ფეისბუქზე თქვენი მეგობრების მიერ დაყენებულ სურათებს წააწყდით წარწერით "არ გაჩერდე", მაგრამ ჯერაც არ იცით, რა ხდება, მაშინ არ უნდა გაჩერდეთ და ეს სტატია ბოლომდე ჩაიკითხოთ:

რამდენიმე დღის წინ საქართველოს ბანკმა ახალი კამპანია წამოიწყო, რომელიც ყურადღების ცენტრში მოქმედების გამომხატველ სიტყვას, ზმნას ათავსებს, ვიდეორგოლში ვხედავთ ადამიანებს, რომლებიც ზრუნავენ, შრომობენ, გამოხატავენ და მოძრაობენ. ტექსტში გამოყენებულია არნ. ჩიქობავას სახელობის ენათმეცნიერების ინსტიტუტისა და ენის მოდელირების ასოციაციის (ena.ge) განმარტებანი, დინამიური სცენების ფონზე კი სრულიად ახლებური "საქართველო ლამაზო" ისმის.

კამპანიაზე სააგენტო JWT Metro-მ იმუშავა. კამპანიის მთავარი იდეისა და განხორციელების შესახებ კი საქართველოს ბანკის ბრენდ მენეჯერს, სოლო წიწუაშვილსა და მეტროს სტრატეგიის ხელმძღვანელს, ლადო მალაზონიას ვესაუბრეთ.

რა არის კამპანიის მთავარი გზავნილი?

სოლო წიწუაშვილი: მოტივაცია, დაწყებული საქმის გაგრძელება და არშეწყვეტა ნებისმიერი ადამიანისთვისაა მნიშვნელოვანი. ცხოვრებაში ნებისმიერი ქმედებაა მისაღები, გარდა უმოქმედობისა. თავად ცხოვრებაც ხომ ზმნაა. კომუნიკაციის დაწყებამდე რამდენიმეთვიანი მოსამზადებელი სამუშაო ჩატარდა, რომლის ფარგლებშიც ჩამოყალიბდა განახლებული სტრატეგიული პლატფორმა. კომუნიკაციის პირველ ეტაპზე კი გადავწყვიტეთ, რომ უმოძრაობას უნდა დავუპირისპირდეთ. კამპანიას უამრავი ინსპირაცია აქვს, დაწყებული ქართული ენიდან, დასრულებული იმ ადამიანებით, რომლებიც ყოველდღიურად, გაუჩერებლად ცდილობენ, რაღაც ღირებული აკეთონ.

როგორ გადაწყვიტეთ, რომ ქართული ზმნა უნდა ყოფილიყო ის, რაზეც ახალი პლატფორმა აიგებოდა?

ლადო მალაზონია: ვფიქრობთ, რომ ჩვენი, როგორც ადამიანების, ისე საზოგადოების მთავარი შემაფერხებელი ფაქტორი უმოძრაობაა. შესაბამისად, კამპანია მამოტივირებელი ხასიათისაა და ადამიანებს შექმნისა და მოქმედებისაკენ მოუწოდებს. მთავარ საკომუნიკაციო ენად ზმნები შევარჩიეთ, რადგან ზმნა მოქმედების აღმნიშვნელი სიტყვაა.

რა არის შემდეგი ნაბიჯი? როგორ აპირებთ კამპანიის გაშლას?

ლადო მალაზონია: აღსანიშნავია, რომ ვიდეორგოლში აღბეჭდილი თითქმის ყოველი სცენის უკან ძალიან საინტერესო, რეალური ისტორია იმალება და მათ შესახებ უფრო მეტს გავუმხელთ მაყურებელს. შეიძლება ითქვას, რომ ვიდეოში პრაქტიკულად ყველა თავის თავს თამაშობს. კამპანიის გამაერთიანებელი პრინციპია ის რწმენა, რომ "ცხოვრება ზმნაა", შესაბამისად მთლიანობაში, სხვადასხვა ფორმებით ვეცდებით თითოეულ ადამიანს საკუთარი ზმნის პოვნისაკენ ვუბიძგოთ.

ერთი რამ ცხადია: რგოლმა უკვე უამრავ ადამიანს უბიძგა მინიმუმ ერთი ქმედებისთვის - მთავარი გზავნილი, "არ გაჩერდე" საკუთარი მეგობრებისთვის გაეზიარებინათ.

ვიდეოს გამოქვეყნებიდან ორ დღეში მილიონზე მეტი ნახვა და 5.5 ათასზე მეტი გაზიარება აქვს, დანარჩენს კი დრო გვიჩვენებს.