ცოტა ხნის წინ საქართველოს კინოაკადემიის ოფიციალურ ფეისბუქ გვერდზე ზაზა ურუშაძის განცხადება გავრცელდა, სადაც რეჟისორი კინოაკადემიის წევრებს მიმართავს და თანამდებობიდან გადადგომის შესახებ ინფორმაციას აცნობს:

კოლეგებო, ბოლო დროს განვითარებული თქვენთვის კარგად ცნობილი მოვლენებიდან გამომდინარე, რამაც ჩემთვის მიუღებელი ფორმა მიიღო, გადავწყვიტე, რომ გადავდგე და დღეიდან ვტოვებ თანამდებობას.

არანაირი სურვილი აღარ მაქვს, მონაწილეობა მივიღო იმ არაჯანსაღ პროცესებში, რომლებიც ბოლო დროს განვითარდა კინოაკადემიაში და პრინციპულად მიუღებელია ჩემთვის.

ნათლად გავაცნობიერე, რომ ურთიერთდაპირისპირებისა და ინტრიგების ფონზე მოგებას ფასი აღარ აქვს.

მინდა, მადლობა გადავუხადო კინოაკადემიის თითოეულ თანამშრომელს, რომლებმაც მართლაც შესანიშნავად, პროფესიონალურად იმუშავეს. მადლობელი ვარ ჩემი მხარდამჭერების და ბოდიშს ვუხდი იმ ადამიანებს, რომლებსაც ჩემმა ამ გადაწყვეტილებამ შესაძლოა, იმედი გაუცრუოს.

და ბოლოს - ჩემი აზრით, აუცილებელია კინოაკადემიის გაახალგაზრდავება, რაც შეიძლება, მეტი ახალგაზრდა უნდა გაწევრიანდეს ამ ორგანიზაციაში, რადგან, დარწმუნებული ვარ, სწორედ ამ შემთხვევაში ექნება პერსპექტივა საქართველოს კინოაკადემიას.

პატივისცემით,

ზაზა ურუშაძე

11.09.2019

შეგახსენებთ, რომ ორ აგვისტოს კინოაკადემიის ყრილობა ხმაურით დასრულდა. აკადემიის წევრების ნაწილს პრეზიდენტი ზაზა ურუშაძის ვადაზე ადრე განთავისუფლება და ხელახალი არჩევნების ჩატარება სურდა. თუმცა სხდომაზე აკადემიის წევრების არასრული დასწრების გამო შეკრება ჩაიშალა. კვორუმი კი ვერ შედგა, რადგან ისეთი წევრების ხელმოწერები, რომლებიც სხდომაზე არ გამოცხადნენ, ნოტარიულად დამოწმებული არ იყო.