"ნატო არ აღიარებს ოკუპირებულ აფხაზეთში ჩატარებულ ე.წ. არჩევნებს", — ამის შესახებ ნატოს გენერალური მდივნის სპეციალური წარმომადგენელი კავკასიაში, ჯეიმს აპატურაი ფეისბუქზე წერს.

"ნატოს მოკავშირეები არ აღიარებენ აფხაზეთისა და სამხრეთ ოსეთის რეგიონის დამოუკიდებლობას. ნატო მხარს უჭერს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში".

ოკუპირებულ აფხაზეთში დე ფაქტო საპრეზიდენტო არჩევნების მეორე ტური გაიმართება. მეორე ტურში ერთმანეთს მოქმედი დე ფაქტო პრეზიდენტი, რაულ ხაჯიმბა და ოპოზიციონერი ალხას კვიციანი შეხვდებიან.

აფხაზეთში არჩევნები 25 აგვისტოს გაიმართა. პირველ ტურში ხაჯიმბამ 26,6 პროცენტი, ხოლო კვიციანმა 24,6 პროცენტი მიიღო. ადგილობრივი დე ფაქტო კანონის მიხედვით, მეორე ტური ორ კვირაში უნდა ჩატარდეს.