Mindhunter ნეტფლიქსის ერთ-ერთი საუკეთესო ახალი სერიალი იყო, რომლის დებიუტიც პლატფორმაზე თითქმის 2 წლის წინ შედგა. იმის შემდეგ, კრიმინალური თრილერის ახალ სეზონს მოუთმენლად ველით.

სერიალის პროდიუსერმა, დევიდ ფინჩერმა სრულიად შემთხვევით, KCRW-ს პოდკასტში სერიალის მეორე სეზონის პრემიერის თარიღი გაგვიმხილა.

მან ფაქტიურად ერთი თვით ადრე გაგვაფრთხილა, რომ 16 აგვისტოს სხვა არაფერი უნდა დავგეგმოთ, რადგან ნეტფლიქსზე ფსიქოლოგიური დრამის მეორე სეზონი ბრუნდება.

ამით მან ასევე დაადასტურა შარლიზ ტერონის სიტყვები, რომ სერიალი აგვისტოში დაბრუნდებოდა.

სერიულ მკვლელებზე დრამის მეორე სეზონი ნეტფლიქსმა ჯერ კიდევ 2017 წლის ნოემბერში დაადასტურა. მასში მოქმედება 1979-1981 წლებში მოხდება და პირველი სეზონიდან 2 წელი იქნება გასული (ისევე, როგორც რეალურ სამყაროში). სიუჟეტი ფოკუსირდება ატლანტას სერიულ მკვლელობაზე, რომელსაც მინიმუმ 28 ბავშვი, თინეიჯერი და მოზარდი ემსხვერპლა.