კუს ტბა მთაწმინდას საფეხმავლო ბილიკით დაუკავშირდება. ამ ინიციატივაზე თბილისის მერმა კახა კალაძემ დედაქალაქის მთავრობის სხდომაზე განაცხადა.

პროექტის შესახებ დეტალები თბილისის მერის მოადგილემ მაია ბითაძემ დააზუსტა. მისი განცხადებით, უკვე დასრულდა ტყის ინვენტარიზაცია, გამოიყო რვა ძირითადი სატყეო სექტორი.

"გერმანიის საერთაშორისო თანამშრომლობის სააგენტომ გამოყო გრანტი ამ სატყეო კვლევების საფუძველზე და ძალიან მალე, რამდენიმე დღეში გაფორმდება მემორანდუმი და წლის ბოლომდე მოეწყობა დაახლოებით ექვსკილომეტრიანი საფეხმავლო ბილიკი, რომელიც კუს ტბას დააკავშირებს მთაწმინდასთან", — განაცხადა მაია ბითაძემ.

მისივე თქმით, ამ ბილიკებზე, ერთი მხრივ, მოეწყობა საკემპინგე ადგილები, დასასვენებელი ადგილები, ეკოლოგიური განათლებისთვის საჭირო ინფრასტრუქტურა, ასევე გადმოსახედები. ასევე ადგილობრივებს შეეძლებათ, ისეთ სივრცეებს გაეცნონ თბილისში, სადაც ხელმისაწვდომობა ნაკლები იყო.

"ასევე მოხდება 20 ჰექტრამდე ტყის აღდგენის ღონისძიებები. ეს იქნება ერთ-ერთი მნიშვნელოვანი პროექტი, რომელიც თბილისის ლანდშაფტის ახალ სივრცეებს აგვათვისებინებს ტურისტული მიზნით", — განაცხადა მაია ბითაძემ.